«МАРИЙ ЭЛ» ТАЧЕ

Кажне еш гыч – элнам аралыше

Тукымыштыда Кугу Отечественный сар годым Кугу Сеҥымашым лишемдаш полшышо-влак лийыныт мо?
Александр Иванов, Шернур тӱвыра пӧрт пелен эстраде мурым йоҥгалтарыше «Вернисаж» студийым вуйлатыше:
– Мыйын кочам – Николай Михайлович Дубников. Тудо 1920 ийыште шочын. Сарын икымше кечылаж гыч тӱҥалын Сеҥымаш кече марте фашист ваштареш кредалын. Сусырген, контузитлалтын, тидлан верчынак соҥгыра лийын. Ӱмыржӧ мучко слуховой аппарат дене коштын. Нуно кум изак-шоляк сарыш каеныт да кумытынат илыше пӧртылыныт. Иктыже подполковник марте шуын да сар деч варат служитлен. Кочам шке кундемыштыже пагалыме еҥ лийын. Уста столяр эше портышкемымат йӧрен, пырдыж шагатым, ургымо машинам тӧрлен. Сар деч вара ӱмыржӧ мучко «Марисолинский» совхозышто апшатлан ыштен. Калыкыште мастар кидан айдеме семын чапым налын. 1996 ийыште ӱмыр лугыч лийын.
Снимкыште: Н.М.Дубников
Галина Шибанаева, Тюмень область Бобровский посёлкысо школын туныктышыжо:
– Кугу Отечественный сарыште мыйын кочам Фёдор Иванович Петухов лийын. 1902 ийыште Кужэҥер район Нурсола ялыште шочын. 1942 ий мартыште нылле ияш сарыш каен. А тылеч ончыч верысе колхозышто плотниклан ыштен. Таза капкылан лийын, кид-йолжо чылалан толын. Архивлаш йодын возымо вашмут почеш, рядовой кочам 1942 ий апрельыште увер деч посна йомын. Москвам аралымаште кредалын. Сусырген, госпитальыш логалын. Но йырым-ваш тале кредалмаш кайымылан кӧра госпитальым эвакуироватленыт…
Ковам Анна Сидоровна, колымешкыже, тудым вучен илен. Кум икшывыштым йол ӱмбаке шкак шогалтен.
«Мемориал» интернет-банк гоч пален налынам: кочам Владимир оласе шӱгарлашке тоеныт.
Нина Васильева, «Марий Эл» увер агентствын корректоржо:
– Ачам Василий Иванович Попов Кужэҥер район Тошто Йӱледӱр ялыште 1924 ийыште шочын. Кугу Отечественный сар годым тудо «СМЕРШ» особый батальонышто служитлен. Сеҥымаш кечым Польшышто вашлийын. III степенян Слава орден дене палемдалтын. Авамат – Анна Андреевна – 20 ияш сарыш каен, Моско воктенысе Раменский авиационно-истребительный полкышто служитлен, моло дыр-влак дене пырля самолет-влакым бойлан ямдыленыт.
Сар пытымеке, ачам ден авам шочмо кундемыш пӧртылыныт, ешым чумыреныт, вич шочшым ончен куштеныт. Ачам сар деч вара госбезопасность органыште пашам ыштен, 1967 ийыште ӱмыржӧ лугыч лийын. Авам 2019 ий марте илен.
С.Носова ямдылен
М.Скобелевын фотожо (редакцийын ахивше гыч налме)

Опубликовать в Одноклассники

Добавить комментарий