Йошкар-Оласе Строительно-промышленный техникум (шке жапыштыже тудо Марий Элын ик эн виян «Марремстрой» трестын базыштыже почылтын да 8-ше №-ан профессионал училище маналтын ) республикыштына кыдалаш профессионал образованийым пуышо ик эн кугу ийготан тунемме верлан шотлалтеш. Витле ий утла тудо регионын чоҥымо отрасльжылан пашазе-влакым ямдыла: чылаже индеш тӱжем утла специалистым туныктен луктын. Таче тиде техникум – шуко профилян, кыдалаш профессионал образованийым илышыш пуртышо интегрированный организаций. 1978 ий гычак тыште начар тазалыкан ӱдыр-рвезе-влакым туныктат, а 2000 ий гыч тудо инклюзив образованийым пуышо базовый тунемме верлан шотлалташ тӱҥалын.
Тиде кечылаште техникумышто республикысе кыдалаш профессионал образовательный организацийлаште начар тазалыкан тунемше-влаклан мастарлык конкурс лийын. Тыгай таҥасымаш тыште икымше гана 2013 ийыште эртен, а 2015 ий гыч – кажне ийын, сандене тудо шукертак йӱлаш савырнен манаш гына кодеш. Тиде гана участник-влак кок профессий – «Cтоляр строительный» да «Ургызо» дене моштымашым ончыктеныт: ончыч теорийым палымыштым тергеныт (30 йодышлан вашмутым пуаш кӱлын), а варажым иктышт ургымо мастарлыкше дене палдареныт, а весышт столяр паша дене кылдалтше заданийым шуктеныт.
Жюрин иктешлымашыже тыгай лийын: «Ургызо» профессий дене 1-ше верыш Софья Максимова (Строительно-промышленный техникум) лектын, а «Столяр строительный» профессий дене тиде тунемме верыштак шинчымашым погышо Сергей Елуков эн уста лийын.
Кызыт Йошкар-Оласе строительно-промышленный техникумыш индеш профессий дене чылаже 373 ӱдыр-рвезе шинчымашым пога. 26 группо гыч колыштыжо коррекционный школ-интернатын 240 выпускникше тунемеш. Палемдыман, кажне ийын техникумышто ача-ава деч посна кодшо 20 утла самырык еҥ шканже специальностьым налеш.
Начар тазалыкан ӱдыр-рвезе-шамычлан таче тыште чылаже 7 профессийлан тунем лекташ йӧн уло. Тиде – «Каменщик», «Столяр строительный», «Штукатур», «Маляр строительный», «Рабочий зелёного строительства», «Ургызо», «Йолчиемым ачалыше».
2019, 2020 ийлаште, кок ий почела техникум начар тазалыкан икшыве-влаклан сай качестван профессионал образованийым пуаш материально-технический базым пеҥгыдемдаш федерал грантым сеҥен налын. Тунемме верым вуйлатыше Эдуард Рябчиковын увертарымыж почеш, средствам ныл направлений дене кучылтмо: тунемме верым учебно-методический могырым уэмдаш, туныктышо-влакын квалификацийыштым нӧлташ, специально-реабилитационный оборудованийым да у техникым налаш. Техникумышто инвалид да начар тазалыкан-влаклан регион кӱкшытан «Абилимпикс» чемпионатым эртараш региональный площадке пашам ышта. Икманаш, строительно-промышленный техникум гай тунемме вер таче республикыштына икте гына.
Г.Кожевникова
