Палынем ыле, ӱмаште Марий Элыште мыняр йоча шочын да мыняр еҥ илыш гыч каен?
Е.Дмитриева
Звенигово район
Йодышлан Маристатын калык, тазалык аралтыш, шинчымаш, науко да инноваций статистике пӧлкаштыже тыге вашештеныт:
– 2021 ий январь-декабрьыште Марий Элыште 6415 йоча шочын. Ош тӱняш толшо у еҥ-влак утларакше олалаште илат: 2715 аза – Йошкар-Олаште, 461 – Волжскышто да 167 – Козьмодемьянскыште.
Район-шамыч коклаште икымше верыш Медведево район лектын, тушто 841 аза шочын, кокымшо верыш – Звенигово район (360 йоча), кумшо верыш – Морко район (294 аза). Волжский районышто 165 йоча ош тӱняш толын.
Ӱмаште январь-декабрьыште республикыштына 11249 еҥ ош тӱня гыч каен. Эн шуко еҥым Юрино, Курыкмарий да У Торъял районлаште йомдареныт.
Регионыштына калыкын чотшо 4834 еҥлан иземын.
Ончылийысе дене таҥастарымаште ӱмаште 17,2 процентлан шукырак мужыр шочын, тыгак 8,8 процентлан шукырак еш шаланен. Мутлан, Волжскышто мужыраҥме нерген свидетельствым 251 у ешлан кучыктымо, а мужыраҥмым шӧрымӧ нерген свидетельствым 280 мужырлан пуымо. Волжский районышто 63 мужыр шочын да 40 еш шаланен.
М.ИВАНОВА