Марий Эл вуйлатыше корно ияҥме пагытыште коммунальный службын кудывечылаште лумым кораҥдыме пашам кузе шуктымыжлан тӱткышым ойырен.
Йошкар-Олан мэржын пашажым жаплан шуктышо Антон Трудинов Марий Эл вуйлатыше Юрий Зайцевлан каныш да пайрем кечылаште коммунальный службын пашам кузе шуктымыж нерген каласкален.
«Уремысе корно сетьлан вуйын шогышо «Город» АО предприятий, «Йошкар-Оласе 1-ше ТЭЦ» АО, «Водоканал» МУП шумлык мутем. Мутат уке, коммунальный инфраструктур сетьлаште могай-гынат аварий эре лиеда, но мемнан службына-влак эҥгекым чулымын кораҥденыт», – палемден Йошкар-Ола мэрын пашажым жаплан шуктышо.
Тале ночко лум да йӱрлан кӧра коммунальный службо-влаклан писын вўдын йоген кайыме канализацийым почаш, кудывечыш кудал пурымо корным уэш-пачаш эрыкташышт пернен. Олаште илыше-влак кудывечысе тротуарлаште путырак яклака лиймылан вуйым шийыныт, сандене коммунальный службо пашаеҥ-шамыч шинчал йӧршан ошмам шавеныт.
Антон Трудиновын каласымыж почеш, виктарыше компаний-влак лумым свалкыш оксам тӱлыде шупшыктен кертыныт. Тачысе кечылан тушко 27 тӱжем тонн лумым наҥгаеныт.
Марий Эл вуйлатыше Юрий Зайцев южо виктарыше компанийын пашам ыштымыжлан тӱткышым ойырен.
«Мылам возат, вуйым шийыт, ола мучко кудалыштшыла тыгай верлам ужам. Содыки кугу неле технике кудалыштдыме кудывече кумдыклан тӱткышым ойырыман. Тиде йодышым виктарыше компаний-влак дене пырля шотыш кондыман. Тичмаш налмаште оласе коммунальный службо-влакын пашаштым сай могырым аклем, туге гынат лум лийын кертеш, паша эше шуко логалеш», – палемден Юрий Зайцев.
Марий Эл вуйлатыше тыгаяк ситуаций рӱдолаштына веле огыл, моло ола ден районлаштат улмо нерген палемден да муниципалитет вуйлатыше-влаклан корно йодышлан тўткышым ойыраш кӱштен.
Марий Эл вуйлатышын пресс-службыжын уверже негызеш Евгений Садовин ямдылен.