3-4 октябрьыште Йошкар-Олаште «Российысе регионлаште калык ден конфессий-влак кокласе вашкыл» всероссийский шанче-практик конференций лиеш.
Тидын шотыштак Марий Эл правительстве председательын алмаштышыже-тӱвыра, савыктыш да калык-влакын пашашт шотышто министр Константин Иванов оргкомитетын заседанийжым эртарен. Мероприятийлан В.М.Васильев лӱмеш Йылмым, сылнымутым, историйым научнын шымлыше марий институт вуйын шогаш тӱҥалеш. Шке конференцийже республикын Тӱвыра, савыктыш да калык-влакын пашашт шотышто министерствыштыже «2013-2030 ийлалан Марий Эл Республикын кугыжаныш национальный политикыже» кугыжаныш программе кышкарыште Калык-влакын пашашт шотышто федерал агентствын полшымыж дене эртышаш.
Мероприятийым эртарыме дене кылдалтше докладым МарНИИЯЛИ директор Людмила Григорьева ыштен. Ойлымыж почеш, пашаче тӱшка программым ямдылен, республикыште кугыжаныш национальный политикым илышыш шыҥдарыме дене кылдалтше фотоончер ямдылалтеш. Тачысе кечылан конференцийыш Москва, Татарстан, Пермский край, Удмуртий, Чуваший гыч шанчыеҥ-влак деч мероприятийыш толаш йодмаш пурен. Конференцийым иктешлымаш почеш доклад-влакым посна савыктышыш чумырат.
Константин Иванов тидлан вуйын шогышо еҥ-влаклан республикыш толаш кумылым ончыктышо шымлызе-влаклан марий калыкын тӱвыраж дене палдарыше программым ямдылаш кӱштен.
С.Носова
Фотом Тӱвыра, савыктыш да калык-влакын пашашт шотышто министерствын сайтше гыч налме.
