11 сентябрьыште Марий Элын МВД-штыже «Калык участковый» всероссийский конкурсын регионысо этапше тӱҥалын.
Республикыште илыше-влак онлайн-йӱклымаш йӧн дене эн ончычак кажне муниципал образованийыште эн сай участковыйым, тылеч вара республикыште ты пашам эн сайын шуктышым ойырен налшаш улыт. Ончыкыжым тудак Марий Элын чапшым Россий кӱкшытыштӧ аралаш тӱҥалеш.
Онлайн-йӱклымашын икымше этапше 20 сентябрь марте республикысе МВД-н официальный сайтыже шуйна. Тудын адресше тыгай: https://12.мвд.рф/народный-участковый-2024.
Туштак «Народный участковый» рубрикыште конкурсыш ушнышо-влакын анкетыштым лудаш да профессионал опытышт, шумо кӱкшытышт дене палыме лияш йӧн уло.
Любовь Камалетдинова
