Сеҥымашын ХХХ идалыкше лӱмеш тӱвыра полатыште 28-31 мартыште «Михаил Мурашко йолташыже-влакым ӱжеш» фестиваль-конкурс эртен.
Тушко Российын тӱрлӧ кундемже да республикнан ятыр районжо гыч чолга ӱдыр-рвезе, усталык коллектив-влак ушненыт. Ныл кече жапыште тӱжем утла участник мастарлыкым ончыктен!
Фестиваль жапыште мемнан йӧратыме «Марий Эл» ансамбльна, тыгак Липецк ола гыч «Казаки России» да Уфа гыч Файзи Гаскаров лӱмеш кугыжаныш ансамбль-влакын мастарлыкыштым ончаш да нунын деч куштымаш искусствылан тунемаш йӧн пуалтын.
Участник-влаклан кумдан палыме хореограф, профессор, акадмик Михаил Мурашкон куштымашым чын шындыме, тӱрлӧ движений нерген каласкалымыже, «Большой театр-Юрий Григоровичын студийже» труппын вӱдышӧ балериныже, Моско гыч «Гжель» куштышо театрын педагог-репетиторжо Татьяна Ледовскихын классический куштымаш нерген урокшо, МарГУ-н тӱвыра да сымыктыш кафедржын доцентше Нина Макарован марий, а «Марий Эл» кугыжаныш куштышо ансамбльым вуйлатыше Александр Селивановын руш калык куштымашын моторлыкшо, ойыртемже нерген каласкалымышт пайдале лийын.
Конкурс жапыште тӱрлӧ калыкын куштымашыже кумылым нӧлтен. Участник-влакым жюри (председательже – Михаил Мурашко) икмыняр номинацийыште аклен.
Гран-прим Пенза ола гыч «Каблучок» калык ансамбль сеҥен налын.
– Конкурсыш икымше гана ушненна да вигак тӱҥ призым сеҥен налмылан, мутат уке, моткоч йывыртенна. Тыште мыланна пеш келшен. Кажне коллектив эн чапле куштымашыжым сценыш луктын, ончен куанет. Мемнан ӱдыр-рвезе-влакат чот тыршеныт, тидыже арам лийын огыл. Чылаже ме 47 еҥ толынна. Толшаш ийын ансамбльланна 50 ий темеш. Садлан репертуарым эреак пойдарена, ончыкыжым Михаил Петрович Мурашкон куштымашыжымат шындаш шонымаш уло, – палемдышт лу ий ты коллектив дене пашам ыштыше, «Каблучок» ансамбльын балетмейстер-постановщикше-влак Оксана ден Павел Докинмыт, – Йошкар-Ола – моткоч мотор ола, Изи Какшан сер воктене эрденат, кастенат моткоч сай, юж яндар, тыште илыше-влакат поро кумылан улмышт дене ойыртемалтыт. Вес ганат Марий Элын рӱдолашкыже толаш кумылна уло.
Фестиваль-конкурсым Йошкар-Олаште эртарен колтымо пашам ынде латкок ий республикысе Калык усталык да тӱвыра ден каныме паша шотышто шанче-методике рӱдерын икоян ешыже тырша. Пашаштым кӱкшын аклен, куштымаш пайремын озаже, Россий искусствын сулло деятельже, Марий Элын калык артистше Михаил Мурашко таум каласен, а участник-влак шотышто тыгерак палемден:
– Кажне ийын конкурс ойыртемалтеш, виян коллектив-влак мастарлыкышт дене куандарат. Теве ты гана Пенза гыч «Каблучок» чотак ӧрыктарыш. Марий куштымаш-влакат чоным куандарат, мутлан, «Эрвел марий» ансамбльын вияҥмыже шижалтеш, тыгак Йошкар-Оласе «Изи памаш», «Шокто, гармонь», Морко гыч «Самырык тукым», Кужэҥер гыч «Топотушки» ансамбль-влакын марий куштымашын моторлыкшым арален кодымышт да тидлан йоча-влакым шӱмаҥдымышт моткоч сай. Но икте чоным тургыжландара: калык коллективыште рвезе-влак шагал улыт, вет тыгай куштымаш нунын деч посна тичмаш огыл – тудым эреак мужыр дене куштат.
Алевтина БАЙКОВА
М.Скобелевын фотожо
Фестиваль-конкурс шотышто икмыняр еҥын шонымашыже:
Истра ола гыч «Боярышня» калык ансамбльым вуйлатыше, РФ правительствын «Душа России» премийжын лауреатше Алла Рыцарева:
– Тений кумшо гана икмыняр номинацийыште мастарлыкым ончыктенна да чылаштыжат икымше степенян лауреат лӱмым налынна. Тидыже мемнан тыршымашнам, мастарлыкнам пеҥгыдемда. Марий Элыш кажне гана куанен толына, ты гана коло утла еҥ улына. Фестиваль жапыште Михаил Петрович Мурашкон мастер-классышкыже логалаш – кугу пиал. Тыгак «йыргешке ӱстел» йыр мутланымаште лийме моткоч кӱлешан: кажне куштымашым лончыленыт, а тидыже балетмейстерлан шкешотан шинчымашым пуа, мастарлыкым вияҥдаш полша.
Шернур посёлко гыч «Ласточка» ансамбльын «Созвездие» куштышо группыжым вуйлатыше Валентина Ешпатрова.
– Кажне ийын конкурсыш ушнена. Ты гана «калык-стилизоватлыме да эстраде куштымаш» номинацийлаш куштымашна-влакым аклаш луктынна да лауреат лӱмым налынна. Тыгай конкурс Российысе виян коллектив-влак коклаште мастарлыкым тергаш да шкан кушкаш, тунемаш йӧным пуа.
«Акцент» ансамбль (Моско ола) гыч Екатерина Маркова, Василиса Вятчанина:
– Моткоч шуко кундем гыч виян, талантан коллектив-влак дене вашлиймылан эн чот куаненна. Ме чылан усталыкым ончыктен таҥасенна гынат, икте-весе дене йолташ лийынна. Тыгай конкурс тӱрлӧ калыкын тӱвыражым пален налаш, нунын ойыртемыштым шижаш полша.
