Марий Эл вуйлатыше Юрий Зайцев приёмым эртарен.
Волжский ден Марий Турек районла гыч еҥ-влак Чодраял-Усола Корамас да Кугу Карлыган ден Изи Карлыган кокласе корным олмыкташ кӱлмӧ йодыш дене лектыныт. Транспорт да корно озанлык министр Александр Герасименко ты шотышто умылтарымашым пуэн. Нине участкылаште корно чынжымак тоштемын да олмыктыман. «Илышлан кӱлешан инфраструктур» нацпроект кышкарыште 2026 ий сентябрь мучаш марте нуным олмыктен шуктышаш улыт.
Юрино посёлко гыч Елена Бабровскаян «Теремок» йочасадым олмыкташ йодмашыжымат регион вуйлатыше шукташак кӱштен. Образований да науко министрын алмаштышыже Валентина Гаврилован рашемдымыж почеш, ты паша 2026 ийыште «Еш» нацпроект кышкарыште шукталтшаш. Тидлан тӱрлӧ кӱкшытан бюджет гыч 63 миллион теҥгем кучылташ палемдыме. А оксаж дене оралте кӧргым, тошкалтышым, пӧртӧнчылым олмыктат, инженер коммуникацийым вашталтат. Тыгак субсидий кӱшеш мебельым, пищеблоклан оборудованийым уэмдат, модышым налыт. Муниципал бюджет кӱшеш сад йырысе кумдыкым тӱзатат.
Йошкар-Ола гыч Нина Васина приёмышто инсулинлан рецептым налме нерген йодышым тарватен, уке гын тудлан кажне тылзын поликлиникыш кошташыже логалеш. Умылтарымашым тазалыкым аралыме шотышто министр Владимир Гледнев пуэн. Ведомство пациент-влаклан эмым налаш электрон рецептым выписатлаш йӧным пуышо приказым ямдылен. Ошкылым сайлан шотлалт гын, пациент-влак кӱлеш медицине документым кугыжаныш да муниципал услугым пуышо единый порталыште личный кабинетыштышт налын кертыт. Проектым тений 1 июнь гыч пашаш колтышаш улыт.
Килемар районышто Сеҥымашлан шарныктыш кумдыкым электротул дене волгалтараш да видеокамер дене пойдараш йодмаш денат регион вуйлатыше деке миеныт. Ты йодышым «Рӱдӧ да Юл кундем Россеть рӱдер» ПАО-н полшымыж дене шотыш кондышаш улыт.
Марий Эл вуйлатышын пресс-службыжын уверже негызеш Светлана Носова ямдылен.
