КУЧЕМЫШТЕ

Кӱлешан да вучымо корно почылтын!

Марий Эл вуйлатышын пашажым жаплан шуктышо 9 сентябрьыште Йошкар-Олаште у автомагистральым почын

Корнын икымше участкыже Ленин проспект ден Луначарский уремым ушен. Ынде шуко еҥан спальный манме район гыч олан промышленный ужашышкыже пробко деч посна ятырлан писынрак миен шуаш лиеш. А тудыжо Йошкар-Олан рӱдӧ ужашыж да икмыняр микрорайонлаж дене йӧршеш лишне верланен. Адакшым у магистральлан кӧра ынде Карл Маркс, Водопроводный, Вознесенский, Дружба, Западный уремлаште транспорт шагалемеш да куштылгынрак кудал эрташ лиеш.

Тиде объектым чоҥымо пашан акше 2,44 млрд. теҥгешке шуын. Тышеч 2 млрд. теҥгеже федеральный бюджет гыч ойыралтын. У корным нӧлтымӧ паша кок йыжыҥ дене шукталтын: Ленин проспект гыч Луначарский урем марте, вара Луначарский урем гыч Карл Маркс урем дене ушнымаш марте.

Марий Эл вуйлатышын пашажым жаплан шуктышо ойлен: Йошкар-Олаште илыше да рӱдолан унаже-влаклан тиде моткочак кӱлешан да вучымо событий лийын. Адакшым магистральым палемдыме жап деч ончыч почмо.

– Тиде кумдык «Лӱдыкшыдымӧ сай качестван корно» национальный проект дене келшышын ышталтын. Ты проект 2019 гыч 2023 ий марте илышыш пурталташ палемдалтын. Но подряд организаций-влакын тыршымышт дене тудым ончылгоч чоҥен шуктымо. Вес семын каласаш гын, 1,5 километр кужытым, кӱварын 200 погонный метржым – палемдыме срок деч ончыч ыштыме. Мый подрядчик-шамычлан тауштем, – каласен Юрий Зайцев.

– 2024 ий марте 50 процент автомобиль корно шотыш кондалтеш, Йошкар-Ола кумдыкышто – 85 процент. Да тынарак «Волго-Вятскуправтодорын» обслуживатлыме федеральный корно. Лектыш кызытак коеш. А тиде эше тӱҥалтыш, икымше йыжыҥ веле. Ме умбакыжат пырля каяш тӱҥалына, – каласен «Волго-Вятскуправтодор» федеральный казенный учреждений вуйлатыше Илдар Мингазов.

Йошкар-Олан мэрже Евгений Маслов ты корно олан транспорт схемыжым чотак вашталта да йӧнаным, транспорт дене кудалыштше-влаклан лӱдыкшыдымым ышташ полша манын каласен.

– Тиде корно нерген Йошкар-Ола шукертсек шонкален, но илышыш нигузе пуртен кертын огыл. Тау чоҥышо-влаклан да республикын правительствыжын командыжлан олалан тыгай пӧлекым ыштымыжлан, – ойлен тудо.

Юрий Зайцев пашам кузе шуктымым аклен да моло уремымат шотыш кондаш кӱлмым палемден.

Республикын транспорт да корно озанлык министрже Александр Герасименкон ойлымыж почеш, Луначарский уремым 2023 ийыште олмыкташ палемдалтын, но пашам ончылгоч шуктен кертме.

– Мыланна 3,4 миллиард теҥге оксам ешарен ойырат гын, 2024 ийлан палемдыме объект-влакым 2023 ийыштак шотыш кондена. Кызыт тидлан ямдылалтмаш кая. Чыла объект шотышто контракт ышталтын, сандене подряд организаций-влак вес сезонлан материалым ямдылат, – каласен Александр Герасименко.

Юрий Зайцев ыштымым кӱкшын аклен да ончыкыжымат тыгак чулымын тыршаш темлен.

Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен

М.Скобелевын фотожо

 

Опубликовать в Одноклассники

Добавить комментарий