КУЧЕМЫШТЕ

Чыла пашам – жапыштыже да сайын

2023 ийыште Марий Элыште 536 тӱжем квадрат метр илыме верым сдатлыме

22 мартыште регионын правительствыштыже национальный проект-влакым илышыш пуртымо, тыгак илалше еҥ ден инвалид-шамычым кужу жап ончымо системын результатше нерген мутланеныт.

«Элнан президентше национальный проект-влакым илышыш пурташ кугу оксам ойыраш кӱштен. Тидыже республикланна кугу йӧным ышта да ответственностьым пышта. Мемнан задачына – тиде средствам лийме семын пайдалын кучылташ, ситуацийым контрольыш налаш, лӱдыкшым шинча ончыч кораҥдаш огыл», – заседанийым почмыж годым манын Марий Элым вуйлатыше Юрий Зайцев.

Чоҥымаш, архитектур да илыме-коммунал озанлык министрын икымше алмаштышыже Людмила Домрачеван увертарымыж почеш, ӱмаште Марий Элыште 536,5 тӱжем квадрат метр илыме верым сдатлыме, тиде показатель ончылийысе деч 22 процентлан кугурак. Тыгай результатыш «Илыме вер» федеральный проектым илышыш пуртымо кӱшеш шумо. Тидлан 2023 ийыште 512 миллион теҥгем ойырымо, тений 1 миллиард теҥгем пыштыме.

«Илыме вер» федеральный проектын полшымыж дене инфраструктурат вияҥеш: Медведево районысо Тойкан ялыште автомобиль корным чоҥымо, Йошкар-Олаште вӱдым йоктарен колтымо канализаций системым уэмден олмыктат, Апшакплак ялыште шуко шочшан еш-влаклан ойырымо мланде участкылашке кугорным шупшыт, рӱдоласе Черняков уремыште рекреационный кумдыкым ыштат. Тылеч посна Чайкина 3-шо изуремысе у микрорайонышко корным чоҥаш палемдыме.

Инфраструктурым вияҥдыме да калыкым илаш йӧрдымӧ пӧртла гыч кусарыме пашаште кумдыкым комплексно вияҥдыме механизмат сай йӧным ышта. Марий Элыште тудын дене кылдалтше индеш ойпидыш почеш 150 тӱжем квадрат метр у илыме верым чоҥаш да 13,3 тӱжем квадрат метр аварий лийын кертме лӱдыкшан илыме верым кораҥдаш палемдыме.

2024 ийыште республикыштына «Культур» национальный проектым илышыш пуртымо кышкарыште ялласе вич тӱвыра пӧртым капитально олмыкташ палемдыме, рашемден Марий Эл правительстве председательын алмаштышыже-тӱвыра, савыктыш да калык-влакын пашашт шотышто министр Константин Иванов. Проектлан чумыржо 691,6 миллион теҥгем ойыраш лийме.

Спорт да туризм министр Лидия Батюкован каласкалымыж гыч, 2023 ийыште Марий Эл «Туризм да унам ончымо индустрий» национальный проектыш пурен. Тудын кышкарыштыже номер фондым кугемдаш, олан турист рӱдержым чоҥаш, событиян мероприятий-шамычым эртараш, калыкле турист маршрут-влакым ышташ да вияҥдаш кугыжаныш полышым колтымо.

Республикыштына илышыш пурталтше «ВӱдЛэнд» инвестиций проектын кышкарыштыже 2027 ийлан кызытсе жаплан келшыше ныл турист объектым почаш палемдыме.

Ю.Зайцев федеральный бюджет гыч ойырымо средства дене чоҥымо объект-влакым палемдыме жапыште сдатлаш задачым шынден.

«Демографий» национальный проектын «Кугурак тукым» федеральный проектшым илышыш пуртымо кышкарыште ыштыме шоҥгыеҥ ден инвалид-влакым кужу жап ончымо системым илышыш пуртымо результат дене регионын паша да социальный аралымаш министрже Марина Островская палдарен.

2023 ийыште республикыштына 2247 еҥым кужу жаплан ончаш налме, а тиде услугым кӱлын ышташ – 1648 пашаеҥым.

2024 ийыште ик у задачылан боевой действий-влакын ветераныштым- специальный военный операцийын участникше-шамычым ончымо услуго шотлалтеш.

Марий Элым вуйлатыше кужу жап ончымо системым илышыш пуртышо социальный обслуживаний организаций-влакын ыштыме услугыштын качествыжым эскераш кӱштен.

Марий Элым вуйлатышын пресс-службыжын уверже негызеш М.ИВАНОВА ямдылен

Д.Речкинын фотожо/ «Марий Эл» увер агентстве

Опубликовать в Одноклассники

Добавить комментарий