19-25 октябрьыште Марий Элыште Диспансеризаций ден профосмотрын кӱлешлыкышт дене палдарыме арня эрта.
Диспансеризаций – тиде черланыме деч аралалтмашке, черым вияҥаш тӱҥалме йыжыҥыштак рашемдымашке да эмлымашке виктаралтше медицине шымлымаш.
Чаманен палемдыман, шуко еҥ жап ситыдымылан, тазалык тургыжландарыдымылан, тӱрлӧ шымлымаш деч лӱдмылан да моло амаллан кӧра тиде йӧн дене огеш пайдалане.
Диспансеризацийын ик эн тӱҥ задачыже – осал черым: шӱм, вӱргорно, бронхо, шодо дене кылдалтше ситыдымашлам, сакыр диабетым, онкологийым – тургыжландараш тӱҥалмыж деч ончычак муаш. Медицине шымлымаш черым эше эмлаш лийме йыжыҥыште рашемдаш полша да паремаш кугу ӱшаным ышта. Икманаш, врач-шамыч диагнозым мыняр ондак шындат, черым тунар куштылго эмлаш.
Профосмотр ден диспансеризаций вияҥаш тӱҥалше черым рашемдымышт деч посна эше айдемым черланен кертме дечат аралат. Врач-шамыч тӱрлӧ анализ ден шымлымашым эртарат да таза илыш-йӱлам кучымо шотышто пайдале ой-каҥашым темлат. Тудыжо кочмо рацион, физический чолгалык да уда койыш шотышто лийын кертеш.
Диспансеризаций годым врач пациент-шамычлан шке тазалык нерген сайынрак пален налаш полша. Тидыже тӱрлӧ чер дене кылдалтше лӱдыкшӧ шотышто шинчымашым нӧлта да калыкым шке тазалыклан мутым кучаш тарата.
Илышын качествыже шкем да шке тазалыкым эскерыме дене чак кылдалтын. Диспансеризацийым жапыштыже эртыше пациент-шамыч кокла гыч шукынжо кужунрак илат да тыгодым эше чулым улыт. Нуно сайын илаш чаракым ыштыше неле чер деч утленат кертыт. Шке тазалыкым эскерыше еҥ родо-тукымжо декат коштын кертеш, йӧратыме сомылжымат шуктен сеҥа, икманаш, тичмашын ила.
Сандене, диспансеризацийым але профосмотрым эртыме шотышто эшеат кокытеланеда гын, тиде процедур ончыкылыш инвестиций манын шоналтыза, вет тазалык дене кылдалтше ситыдымашым жапыштыже рашемдыме йӧн чӱчкыдын илышым утарен кодаш да кужу жап чулым лияш полша.
Диспансеризацийым илыме верысе поликлиникыште тӱлыде эрташ лиеш. Тидланже пелен обязательный медицине страхованийын полисшым да паспортым гына налман.
Ушештарена: 18 гыч 39 ияш марте ийготан еҥ-влаклан диспансеризацийым кум ийлан ик гана, 40 ий деч вара кажне ийын эрташ темлалтеш.
Аралыза шкендам да таза лийза!
Наталья БЛОШЕНКО,
Мер тазалык да медицине профилактике рӱдерын вуйлатышыже.
Маргарита ИВАНОВА ямдылен.
Марий Эл Тазалык аралтыш министерствын пресс-службыжын фотожо.
