Йошкар-Оласе «Планета» ужалыме рӱдерыште «ВИЧ-лан тестым эрте» куснылшо ончер пашам ышта. Тудын темлыме 22 фотографийыште республикыштына кумдан палыме еҥ-шамычым ужаш лиеш.
Тыгай сынан кампанийым Марий Эл Республикын СПИД да инфекциян тӱрлӧ чер ваштареш кучедалме, профилактикым эртарыме республикысе рӱдер да Республикысе клинический эмлымвер полшымо дене Марий Эл Республикын Мер палатыж дене пырля «ОПОРА» мер организаций эртара.
Фотоан тиде ончерым ВИЧ/гепатитым тестироватлыме визымше европейский арня, «СТОП ВИЧ/ СПИД» тӱнямбал акций да СПИД ваштареш кучедалме кече вашеш чумырымо.
Фотосессийыште Л.Яковлева, В.Зотин, М.Швецов, М.Винокуров, Ю.Синьковский гай кумдан палыме политик, тӱвыра да сымыктыш пашаеҥ-влак калыкын тӱткышыжым ВИЧ-инфекций йодышлан ойырымо ӱжмашан плакатым кучен участвоватлат.
Ончерын цельже – инфекцийын у случайжым анонимный тестированийым шке кумылын эртыме дене рашемдымаш, вет кушкын толшо тукымлан гражданский койышын кӱлешлыкшым кугыжаныш да калык вий дене гына умылтараш лиеш.
Ужалыме рӱдер ончылнысо площадкыште кумылан чыла еҥ ВИЧ-лан тестированийым яра эртен кертын.
ВИЧ-инфекцийын вийым налмыжлан 30 ий утла эртен гынат, тиде чер кызытат айдеме тукымлан ик эн лӱдыкшӧ семын кодеш. Эпидемий тӱҥалме деч вара 75 миллион наре еҥ черланен, 36 миллион утла колен.
М.ИВАНОВА.
