Тений Йошкар-Ола администрацийын комиссийже торым лӱмын пеҥгыдемдыдыме верыш кышкыме шотышто 78 делам ончен.
Шӱкым кышкыме верым шке семын ыштыме Йошкар-Олам тӱзатыме правилым пудыртымылан шотлалтеш да тидлан граждан-влаклан 3 гыч 4 тӱжем, должностьышто улшо еҥлан 5 гыч 15 тӱжем, юридический лицалан 15 гыч 25 тӱжем марте штраф пуалтеш.
Контейнер площадке воктеке кушкыл укшым да мойн оптымат пеҥгыдемдыдыме свалкым ыштымылан шотлалтеш, молан манаш гын законодатель тыгай торым пеҥгыде коммунал шӱк радамыш пуртен огыл, сандене регионысо оператор тудым полигоныш наҥгайыдеат кертеш. Кушкыл деч кодшо шӱкым участкын але организацийын озаже шкеак утилизироватлышаш але полигоныш наҥгаен кудалтышаш.
Ола администрацийын контроль пӧлкаже Йошкар-Ола кумдыкым тӱзатыме правилым шуктымым тергенак шога. Ончыч ответственный еҥлан рашемдыме нарушенийым шке кумылын кораҥдыме шотышто предписанийым ышта. Тудын жапше эртымеке, административный правам пудыртымо нерген протоколым воза – тыгодым штраф деч иктат огеш утло.
Палемдыдыме верыш торым оптымылан мутым чылан кучат. Мутлан, Первомайский изуремыште шӱкым оралымыжлан ик еҥлан 3 тӱжем теҥге штрафым пуэныт, Павленко уремысе 74-ше Б №-ан пӧрт воктене свалкым ыштымылан организацийлан 5 тӱжем теҥге штрафым тӱлыктеныт. К.Маркс уремысе 114-ше, Кремлёвский уремысе 26-шо да Красноармейский уремысе 46-шо №-ан пӧртла воктене свалкым ыштыше-влакымат штрафоватленыт.
Снимкыште: августышто тыгай тор ора «Голландия» сатулымо рӱдер воктенат тыманмеш шочо, но вара тудым шӱкым оптымо контейнерге кораҥдышт.
М.ИВАНОВА
Авторын фотожо
