Шыже призыв – 2022
Кӧ служитлаш тӱҥалеш?
Тений шыже призыв 1 ноябрь гыч тӱҥалын. Марий Эл гыч икымше тӱшка самырык еҥым ноябрь кыдалне колтат.
– Ончычсо дене таҥастарымаште призыв кок тылзылан кӱчыкрак лиеш.
Марий Эл гыч военный службым эрташ шым шӱдӧ наре самырык еҥ кайышаш, – палемден журналист-влак дене пресс-конференцийым эртарымыж годым республикын военный комиссарже Ю.Аксёнов.
Рвезе-влаклан отсрочкат пуалтеш. Мутлан, тыгай категорийыш пурышо-влаклан:
• очно тунемше студент-шамычлан;
• кум ияш марте, тыгак кок-кум йочан ачалан;
• черле родо-тукымжым ончышо (тудын деч посна нигӧлан ончаш гын);
• тазалык шотышто жаплан келшен толдымо еҥлан;
• икшывым шкет ончышо ачалан;
• пелашыж дене йочам вучат гын (22 арня утларак мӱшкыранлан);
• йот кундем гыч толшо-влаклан.
Тыгодым рвезе службо деч йӧршеш кораҥдалтеш:
• начар тазалыкан (врачебный комиссийын решенийже почеш);
• шанче аланыште тыршыше иктаж степенян;
• судитлалтше але следствийыште улшо;
• службышто ӱмыр лугыч лийшын эргышт, шольышт;
Повесткым налше да тыгодым военкоматыш толдымо рвезе-шамычым кок ий марте эрык деч посна коден кертыт але 200 тӱжем теҥге штрафым тӱлыктат да исправительный пашам пуат.
Шыже призывыш логалше рекрут-влак спецоперацийыш огыт логал, но тыгодым кум тылзе службо деч вара контрактым подписатлен кертыт. Контракт почеш службым ойырышо-влак профотборым, поснак психологий велым келгырак тергымашым эртат.
Юрий Викторовичын ойлымыж почеш, рвезе-влак элыштынак службым эртат. Спортышто сай результатым ончыктышо, спорт мастер, спорт мастерыш кандидат-шамыч спорт ротыш логалын кертыт. Альтернативный службым эрташ ик еҥ ямдылалтеш. Молгунамсе семынак кўшыл заведенийым тунемын лекше-влакын специальностьыштымат шотыш налыт. ДОСААФ-ыште тунем лекшыланат тўткыш кугурак лиеш. Тений тушто техникым виктараш 200 наре еҥ тунемын.
Шуко ача-ава сото телефон нерген йодеш. Чынак, пытартыш жапыште тидыже лӱдыкшым луктеш, вет тачысе саманлан келшен толшо телефон, айфон… айдемын кушто улмыжым шижтара. Тачысе ситуацийым шотыш налын, тыгайже айдемыланат, кушто служитлыме верланат уто лӱдыкшым луктеш, сандене кнопкан телефон дене пайдаланыме йӧн сайрак манын палемдышт. Тыгодым ончычсо жапымат шарналташ уто огыл: серышым возаш.
Кажне призывниклан республикысе военкоматыште службым эртыме вер марте каяш кочкыш-паёкым пуат, мо кӱлешым кучыктат.
Е.Эшкинина.
