УВЕР ЙОГЫН

Финн-угровед-влак погынат

4-7 июньышто Ижевскыште финн-угровед-влакын «Финн-угор тӱня Российын полиэтнический кумдыкыштыжо: тӱвыра поянлык да у ӱжмаш» VI всероссийский шанче конференцийышт лиеш. Тушко Марий Эл гыч 9 еҥан делегаций кая, тудым Марий кундемысе финн-угровед-влакын комитет председательже О.Сергеев вуйлата.

Погынышо-влак финн-угор языкознаний, фольклористике, литературоведений, музыкальный культур, этнический историй да этносоциальный процесс-влак дене кылдалтше кызытсе жаплан келшыше йодыш нерген каҥашаш тӱҥалыт. Конференцийыште пленарный да секций заседаний-шамыч эртаралтыт. Участник-влакым тыгак «Одо литературын у историйже: жапын йодмжылан келыштаралтмаш да у шонымаш-влак» симпозиум, «Йылмын национальный корпусшым ыштымаште пӱсӧ йодыш-влак» да «Чекдыме образований» «йыргешке ӱстел-шамыч» вучат.

Тидын деч посна Российын тӱрлӧ кундемже, тыгак Австрий, Великобританий, Германий, Финляндий, Эстоний да моло йот элла уна-влаклан Ижевск ола мучко экскурсий эртаралтеш.

Г.Кожевникова.

Опубликовать в Одноклассники

Добавить комментарий