Одо кундемысе Бураново селаште «Бурановские бабушки» чапланыше фолькор коллективын солисткыже Наталья Пугачёвам пытартыш корныш уло села дене ужатеныт, возат рӱдӧ изданийлаште.
Ансамбльже нерген ме 2012 ийыште Бакушто эртыше «Евровидений» конкурсышто ойыртемалтмыж деч вара пален налынна. Одо калык вургемым чиен лекше тыглай ялысе ӱдырамаш-влак англичанла веле огыл, шке шочмо йылмышт денат муреныт. Кузе нуным мондет?! А ты чолга изи капан ӱдырамашым ансамбльыштыже «пӧртгайык» манын лӱмденыт. Эн весела да кумылым налын моштышо ковайлан 28 октябрьыште 84 ий темшаш ыле, но 27 числаштыже тудым тояш логалын.
Ансамбльын художественный вуйлатышыже Ольга Туктареван ойлымыж почеш, пытартыш ийын Наталья Пугачева черле лийын. Куд ий ончыч тудо онкологий чер дене черланен. 2013 ийыште Москваште Блохин лӱмеш онкологий рӱдерыште операцийым ыштеныт. Чер чакнен улмаш, ӱдырамаш сценышкат угыч лекташ тӱҥалын. Но тений кеҥежым чер угыч пӧртылын. Тиде чолга, чытышан ӱдырамашым пырля выступатлыше йолташыже-влак пеш поро, пашаче, сай озавате, весела кумылан еҥ семын шарналтат. Ансамбльыште тудым талисман семын эре покшек шогалтеныт. А тудо кеч-могай мурым йоҥгалтарыме годым кажне шомакшым модын, кушталтен ончен кертын. Ансамбльжат кызыт «Бабушки из Бураново» маналтеш.
С.НОСОВА.
