Тиде кечылаште элыштына ик эн уста туныктышо ден воспитатель, школ директор-влаклан Россий кӱкшытан профессионал мастарлык конкурс-шамычын пытартыш йыжыҥышт эрта. Тушто Марий Эл гыч участник-влак моштымашым ончыктат.
Саратов олаште «Российын Идалыкын туныктышыжо-2024» профессионал мастарлык конкурсын пытартыш йыжыҥыштыже республикнан чапшым Йошкар-Оласе Семёновка селаште верланыше 21-ше №-ан школышто тӱҥалтыш классым туныктышо Вероника Литвинова арала.
Тений конкурсышто элна гыч 29 педагог мастарлыкым ончыкта. Участник-влак почмо урокым ончыктат, жюрин еҥже-влаклан педагогический интервьюм пуат. Тиде пытартыш этапын икымше туржылан шотлалтеш. Кокымшыжым Москва областьысе «Взлёт» тунемме рӱдерыште эртараш палемдыме.
Конкурс 29 сентябрь марте шуйна. Сеҥыше-влакым 5 октябрьыште саламлаш тӱҥалыт.
Тиде кечылаште Уфа олаште ешартыш образованийым пуышо ик эн виян туныктышо-влакын «Шӱмем йоча-влаклан пуэм» Россий кӱкшытан конкурсыштын финалже эрта. Тушто Йошкар-Олаште верланыше Йоча да самырык-влаклан усталык полатын педагогшо, регион кӱкшытан профессионал мастарлык конкурсышто сеҥыше Оксана Глозштейн усталыкшым ончыкта. Моло участник-влак дене пырля тудо «Тура-Хан» Евразий тоштерыште экскурсийыште, тыгак мастер-класслаште лийын. Тидын деч вара финалист-шамычлан конкурс-влак тӱҥалыныт.
Ты арнянак Москва областыште «Российын Идалыкын воспитательже-2024» конкурсын пытартыш йыжыҥже эрта. Тудыжо тений 15-ше гана лиеш. Тушто Россий Федерацийын 87 регионжо гыч ик эн уста воспитатель-влак моштымашым ончыктат. Нунын коклаште – Марий Эл гыч Людмила Басманова. Тудо Медведево районысо Руэм посёлкышто верланыше «Чодыра йомак» йочасадыште тырша.
Икымше турышто конкурсант-влак йоча ден ача-ава-влаклан мероприятийлам эртарат. Тудын результатше почеш 15 финалистым ойырат, лач нуно конкурсын лауреатше лийыт да кокымшо турыш куснат. Тушто «Российын Идалыкын туныктышыжо», «Российын Идалыкын школ директоржо», «Икымше туныктышо» всероссийский конкурс-влакын лауреатышт дене пырля «Мастер-класс», «Брифинг» да «Блицтурнир» конкурслаште моштымашым ончыктат.
Г.Кожевникова
Снимкыште: Вероника Литвинова, Оксана Глозштейн, Людмила Басманова.
Фотом Марий Эл Образований да науко министерствын сайтше гыч налме
