Марий Элысе Юмыйӱла ушемын Йошкар-Оласе «Марий кумалтыш» общиныжым лишыл ныл ий Александр Бирюковак вуйлаташ тӱҥалеш.
Тыгай ӱшаным ыштеныт теҥгече общинын отчет да сайлымаш погынымаштыже. Александр Васильевич ты мер организацийым 2019 ий 22 декабрь гыч вуйлата. Ныл ий жапыште общинын активше дене ятыр сомыл шукталтын. Йошкар-Ола воктенысе Тумерыште верланыше кӱсото кумдыкым эрыктен, шотыш пуртен шогымо. Тушто идалыклан кок гана, шошым да шыжым, кумалтышым эртарыме — Агавайремым да мер кумалтышым. Кажне ийын Йошкар-Олаште марий Кугечым кугезына-влакын йӱлаштым шотыш налын вашлийме. 2022 ийыште «Эр ӱжара гыч кас ӱжара марте» пелештыме мут книгам савыктыме.
Общинын тӱҥ онаеҥже Юрий Тушнурцев ден Александр Бирюков республикысе, Российысе моло кундемлаште кумалтышлаш полшаш коштыт. СВО-ш кайыше салтакна-влаклан марий йӱла почеш пелештен, аралтыш-шевроным пуэн колтат. Республикнан, калыкнан жаплыме пайремлашкышкат кумылын ушнымо. Ӱмаште шыжым ХII Марий калык погынышто марий йӱла секцийыште общинын еҥже-влак чолган пашам ыштеныт. Сомылым виктарымаште мер калыкынат, республикысе кучем дечат полыш лийын.
Погынымаште общине радамыш ушнаш кумылан кум еҥын возымо йодмашыштым ончымо. Кажныже але мартежат мер пашаште ӱшанле лийыныт, сандене йодмашыштым ик ой дене сайлан шотлымо. Пӱртӱс юмым жаплыше, марий йӱлам кучышо але мелын шогышо моло еҥ-влакымат ушнаш кумылын вучат.
Актив дене тыгак 2025 ийлан паша планым пеҥгыдемдыме: але марте шуктен шогымо радам денак вияҥаш, марий йӱлам шуктен илаш, пайрем-влакым эртараш, ола кумдыкышто кумалме-вер-влакым арален кодымо пашам умбакыже шуяш. Лишыл мероприятий — марий Кугече. Тудо 20 апрельыште лиеш.
Светлана Пехметова.
Снимкыште: Йошкар-Оласе «Марий кумалтыш» общинын эртарыме марий Кугечыште юмым пелештыме тат: общинын еҥж-влак Юрий Тушнурцев, Александр Степанов да Александр Бирюков.
М.Скобелевын фотожо
