13 январьыште Урал кундем Изи Тавра ялыште Шорыкйол пайремым эртаренна. Кечывалым тӱвыра пӧртыш илалше-влак чай йӱмашке чумыргеныт. Нунын дене тӱрлӧ модыш дене модынна, туштым туштенна, мужедынна, муренна, куштенна.
Тыгай шотан пайремым ынде вич ий ветеран-влак ушемын советше ден верысе тӱвыра пашаеҥ-шамыч эртарат. А кастене йоча-влак сурт еда озалан сугыньым пуэн, муралтен, кушталтен коштыныт. Мыят тӱвыра пашаеҥ-влак дене пырля тиде пайремышке кастене лектым. Кажне пӧртыш пурен, суртоза-шамычлан оҥай йодышым пуэденна, ӱян, мӱян, улан илышым, тазалыкым, патырлыкым тыланышна. А кастене ялысе тӱвыра пӧртыш уло ял калык погынен, Шорыкйол пайремым ожно кузе эртарыме нерген мутланенна, тӱрлӧ модыш дене модынна, мужедынна.
Пайремышкына Российысе фотохудожник-влак ушемын еҥже, Екатеринбургысо фотограф, дизайным туныктышо Федор Телков, Москва гыч фотограф да журналист Александр Сорин, Берлин гыч шымлызе Наталья Кондратова миеныт ыле.
В. БАКЕТОВ.