Марий Эл вуйлатыше Юрий Зайцев РФ президентын Юл кундем федерал округышто полномочный представительже пеленысе советын пашашкыже ушнен.
Регион-влакын вуйлатышышт Озаҥыш погыненыт, нуно Юл кундемын вияҥмыж дене кылдалтше пӱсӧ йодыш-влакым каҥашеныт.
«Кодшо идалык мучаште Россий президентын миграций дене кылдалтше икмыняр указше, тыгак федеральный закон-влак лектыныт. Ятыр вашталтыш илышыш пурталтын», – палемден РФ президентын Юл кундемыште полномочный представительже Игорь Комаров.
Марий Элын климат ден экономике условийже-влакым шотыш налын, йот эл гыч толшо-шамыч мемнан дене кодаш кумылан улыт. Кодшо идалыкыште республикыш Индий, Узбекистан, Таджикистан, Азербайджан, Туркмений гыч толыныт.
«Россий президентын палемдымыж почеш, мигрант-шамыч мемнан дене илаш шонат гын, паша рынкыште нелылык лекшаш огыл. Марий Элыште ты шотышто паша сайын ворана. Йот эл гыч толшо 50 процент гражданже миграционный учётыш шогалмыж годым тышке толмо амал семын тунеммашым ончыкта, 25 процент – пашам», – палдарен Юрий Зайцев.
Весымат ончыктыман: 2025 ийыште мигрант-влаклан икмыняр направлений дене пашам шукташ чарыме. Мутлан, алкогольым рознице дене ужалаш, аптекыште, уремыште ужалыме пашам шукташ. Нине мере-влак тыгак верысе калыкын интересшым аралымашке да кӱлешан секторышто, йот эл гыч толшо паша вийын шинчашкыже ончыде, илышым ворандарымашке виктаралтын.
Марий Элыште йот элла гыч толшо-влакын чотышт республикысе демографий, социально-экономике сӱретыште пешыже огеш палдырне. Миграций йодыш виктаралтеш манашат лиеш, да разрешитлыме отрасльлаште специалист-влакым ситараш кучылталтеш. Республикын правительствыже ты йодыш шотышто верысе калыкын интересшым арала, экономикын йодмашыжым шукташ да йот граждан-влаклан мемнан дене илаш йӧным ышташ тырша.
Марий Эл вуйлатышын пресс-службыжын уверже негызеш Светлана Носова ямдылен.
