Йошкар-Олаште «Единый Россий» партийын Марий Элысе пӧлкажын XXXVI конференцийже эртен.
Калык-влакын келшымаш пӧртыштышт депутат, СВО-н ветеранже, «Марий элын Геройжо-влак. Талешке-влак» регионысо кадр программын участникше-влак да активист-шамыч партийын ончылгоч йӱклымашын лектышыжым, инициативылаш пыштыме бюджетым, партийын Калык программыжын да республикыште илыше-влакын илышыштым йӧнанракым, сайракым ышташ полшышо мероприятий-влакын пайдале улмыштым каҥашеныт.
Регионысо пӧлкан секретарьже, Марий Элым вуйлатыше Юрий Зайцев РФ Кугыжаныш Думысо кампанийым ямдылыме шотышто икымше этапшым генеральный репетиций семын палемден. Тудын мутшо почеш команде дене пашам ыштыме да кампанийыш ятыр сайлышын ушнымыжо кӱкшӧ результатым ончыкташ йӧным пуэн.
— Процедурыш 72765 еҥ регистрироватлалтын, а йӱклымашке 65784 еҥ ушнен. Тидыже 2024 ийысе деч 7 тӱжем еҥлан шукырак. Ончылгоч йӱклымаште сайлыше-влакын чумыр чотышт 12,65 процент лийын, тидыже эн ончычак еҥ-влакын «Единый Россий» партийлан ӱшанымыштым ончыкта, — каласен Юрий Зайцев.
