Марий Эл Тазалык аралтыш министерствын увертарымыж почеш, «Здравоохранений» национальный проектын «Икымше медико-санитарный полышым пуымо системым вияҥдымаш» регионысо проектшым илышыш пуртымо кышкарыште тений санитарный авиацийын вертолётшо дене кум гана пайдаланыме, кум ганажат – мартыште.
Икымше пациентым, шӱм приступ дене орланыше 67 ияш ӱдырамашым, Козьмодемьянск гыч Йошкар-Олашке Регионысо вӱргорно рӱдерыш кондымо.
Вес кечынак вертолёт 16 ияш подросткым Йоча республиканский клинический больнице гыч Нижний Новгородыш наҥгаен. Рвезе шочмо кечыж деч ончыч корно-транспорт азапыш логалын. Пациентлан ончыч Йошкар-Олаште операцийым ыштеныт, вара Травматологий да ортопедий институтыш колташ пунчалыныт. Кызыт тудын тазалыкшым федеральный рӱдерын специалистше-шамыч эскерат.
13 мартыште вертолёт южыш кумшо гана нӧлталтын, корно-транспорт азапыш логалме деч вара Кировысо Травматологий, ортопедий да нейрохирургий рӱдерыште эмлалтше пациентым Шернур районысо рӱдӧ больницыш конден.
Марий Эл санитарный авиацийын услугыж дене палемдыме деч шукырак пайдалана. Мутлан, 2022 ийыште 43 полышлан ойпидышым ыштен гын, вертолёт южыш 44 гана нӧлталтын. А 2023 ийыште 47 олмеш 48 рейсым ыштыме дене 51 пациентын илышыжым арален кодаш йӧн лийын.
2024 ийыште санавиацийын вертолётшо дене 51 гана пайдаланаш ойпидышым ыштыме.
М.ИВАНОВА
Интернет гыч налме фото
