22 августышто Йошкар-Олаште стратегический сессий эртен. Тушто Марий Эл вуйлатышын пашажым жаплан шуктышо Юрий Зайцев лийын.
«Мыланем еҥ-влакын шонымашыштым палаш кӱлеш. Пеш шуко информаций пура, тудым радамлыман. Кӱлешлыкше уло мо, пайдаже могай, кузе решатлаш – чыла тидым лӱмын ыштыме команде кызыт шымла», – каласен тудо.
Ик эн пӱсӧ йодыш семын Ю.Зайцев кудывечыласе кумдыкым тӱзатымым шотла. Мутшо почеш, ты пашам нимогай программыш пуртымо огыл, нуным муниципалитет олмыктышаш. А тудын оксаже кушеч? Тений ты пашалан икымше гана 145 миллион теҥгем ойырымо.
«Интеграл» микрорайонышто аяр шикш шарлыме йодыш шотышто шуко ыштылтын, но пытартыш точкым шындымешке тергыман, кучемын федеральный органжымат йодаш перна.
Ятыр йодыш, темлымаш, ой-каҥаш лийын. Икмынярже:
Йодыш: «Тӱшка калыкым шупшыктышо транспорт коммерций сыным налын. Жапым огыт ончо, остановкеш огыт чарне, ӱчашен-ӱчашен кудалыштыт».
Ю.Зайцев: «Коммерцийыш савырнышаш огыл, корнышто порядке лийшаш».
Йодыш: «Нацпроект почеш олымыктымо корныштат йӱр деч вара кугу вӱд погына».
Ю.Зайцев: «Кажне участкым посна ончаш тӱҥалына. Амалжым палаш кӱлеш».
Йодыш: «Образований тӧнежлаште туныктышо да воспитатель-влаклан пашадарым кӱзыктат мо?»
Ю.Зайцев: «Ты профессий кӱлешан категорийыш пура. Индексаций кая. Кеч-мо гынат, пашадар кажне ийын кугемеш».
Предпринимательын темлымашыже: «Бизнес дене кылдалтше йодышым решатлаш, министерствыла, тӱрлӧ ушемла гыч еҥ-влакым ушен, посна ушемым ыштыман».
Ю.Зайцев: «Ме тидым ыштена. Ме – тиде правительстве. Районыш лектын коштмем годымат мый бизнесъеҥ-влак дене вашлияш тыршем».
Шуко шочшан ачан йодышыжо: «ОМС полис дене оласе медучрежденийлашке логалаш пеш йӧсӧ».
Марий Элын тазалык аралтыш миниитрын алмаштышыже Ю.Зейтулаева: «Поликлиникыласе улшо «Доктор 12» портал гоч возалтащ лиеш».
Ятыр йодышлан вашештымек, Юрий Зайцев каласен: «Мый кажне у шонымашым куанен вашлиям, шочмо олашт верч чон йӱлен тырышыше-влакын инициативыштлан тауштем».
Марий Эл Республикыс вуйлатышын организаций да аналитике виктемжын уверже негызеш Л.СЕМЕНОВА ямдылен
Д.РЕЧКИНЫН фотожо
