Таче, Россий Вооруженный Вийын Украиныште специальный военный операцийым эртарымыж жапыште, шочмо элын волгыдо ончыкылыкшо да эрыкше верч тургыжланыше кажне еҥ сарзе землякна-влаклан мо дене гынат пайдале лийнеже.
Звенигово район Красногорский ола шотан илемысе калык гуманитар полышым погымо акцийыш СВО тӱҥалме икымше кечыла гычак ушнен, октябрьыштат спецоперацийым эртарыме кумдыкыш пеш кугу грузым колтен. Тиде акцийыш организаций-шамычат кумылын ушненыт. Сарзына-влак поснак «Вкуснотеевъ» ООО-н директоржо Ф.Г.Шагеевлан тауштат – свежа шере кочкыш чылалан келшен, тыныс жапыште паша деч вара але каныш кечын еш дене ӱстел йыр погынен шинчылтмым ушештарен да сеҥымаш верч кредалаш эшеат кугу кумылым луктын. Амалкалче-влак Т.Е.Лебедеван, В.С.Авксентьеван да Е.С.Кривошееван колтымо озанлык сатушт ден чоҥымо материалыштат моткочак кӱлеш лийын.
Посёлкысо ӱдырамаш-влак кокла гыч иктышт, чон шокшым пыштен, сеҥымашым тыланен пидме носки ден мочылам, консервироватлыме пакчасаскам колтеныт, весышт – кече еда тыршен пидме маскироватлыше 11 сетьым, окопышто пайдаланыме 250 наре сортам, 300 армейский душым. Калыкын погымо оксаж дене газ баллоным, вӱдыжгӧ солыкым, йымал вургемым, парняшан пижым, балаклавым, шокшо носким, йолчием пундашыш пыштыме шартышым, «Звениговский» шыл комбинатын пучымышыж ден тушёнкыжым да эше шуко кӱлешан арверым налме. Красногорский больницын да Машиностроитель уремыште верланыше «Аптеке 12» организацийын коллективышт тӱрлӧ эмым погеныт.
«Ончалза, ме, вургыжшо да йӱлышӧ шӱм-чонан, полшаш кумылан еҥ-влак, мыняр шукын улына! Чылаландат эше ик гана кугу тау. Пырляште – вий, пырляште – сеҥымаш!» – маныт гуманитар грузым погышо-влак да тиде акцийыш молымат ушнаш ӱжыт.
Красногорский ола шотан илемыште гуманитар полышым Машиностроитель уремыште верланыше 19-ше №-ан пӧртыш шкеак намиен пуаш але оксам 89276830441 номеран телефон дене Светлана Васильевна С.-ын счётышкыжо «СВО-лан» палемдымаш дене колташ лиеш.
М.ИВАНОВА
