6-7 июньышто Марий Элыште профессионал мастарлыкым тергыме «2024 ийыште эн сайын чодырам йӧрыктышӧ» да «2024 ийыште харвестер ден форвадерын эн сай машинистше» конкурс-влак лийыныт.
Нуным Юл кундем кугыжаныш технологий университет ден Марий Элын Пӱртӱс поянлык, экологий да йырым-йырысе средам аралыме шотышто министерствыже Марий Элын Чодыра дене пайдаланыше-влакын ушемышт полшымо дене эртареныт.
Российын 11 регионжо, тыгак Беларусь гыч участник-влак толыныт. Мо оҥайже, тушко ушнаш кумылан-влак коклаште кажне ийын студент-шамычат шукемыт.
Икымше конкурс кечын Нолько чодыра участкысе тунемме-опытный озанлыкышыте таҥасеныт гын, кокымшо кечын – Йошкар-Оласе Ленин лӱмеш площадьыште.
Участник-влак моштымашым ончыктеныт: пушеҥгым йӧрыктеныт, укшыжым пӱчкеденыт, чепым вашталтеныт, пырням комбинироватлыме йӧн дене да иканаште чын ямдыленыт.
Организатор-влак ончаш мийыше-шамычланат интерактивный программым ямдыленыт. Юл кундем кугыжаныш технологий университетын, республикысе Йоча экологий да биологий рӱдерын пашаеҥже-влак мастер-классым, Авиалесоохранын специалистше-шамыч тӧрсыран полосам эртареныт. Конкурсын партнёржо-влакын техништым ончалаш, аквагримым ышташ, тематическй фотозонышто войзалташ, концертым ончаш йӧн лийын.
Жюрин иктешлымашыже почеш, мемнан республикысе участник-влак коклаште чодырам эн сайын йӧрыктышылан И.Харламовым, «Юниор» категорийыште Моско область гыч С.П.Королев лӱмеш техникум гыч Т.Селезневым да «Профессионал-влак» тӱшкаште Брянск область гыч А.Азариным шотлымо. «Харвастерын эн сай машинистше» А.Попов, а «Фарвадерын эн сай машинистше» И.Семёнов лийыныт.
«Таҥасымашым пеш сайын организоватлыме. Моло кундем дене таҥастарымаште, участник-влак пушеҥгым чодыра кумдыкыштак йӧрыктеныт. А моло вере ты паша лӱмын ямдылыме полигонлаште гына шукталтеш. Конкурсын кокымшо ужашыжым ола покшелне эртарымымат сай велым палемдынем: кажне кумылан еҥ ты пашам кузе шуктымо радамым эскерен кертын», – каласен Иван Харламов.
С.Носова
