Шернур район Кукнур кундемыште, Йӱштӧ Кугызан илемыштыже, тений луымшо йоча Ӱярня эртен.
Республикысе Марий тӱвыра рӱдер икымше тыгай мероприятийым Советский районысо Ӱшнӱр школышто эртарен. Варажым Оршанке, Волжский, Морко районлаште лиеден. А тений шке капкажым икшыве- шамычлан йомак тӱням ушештарыше илем почын.
Участник-влак Кукнур школышто вашлийыныт. Шернур, Кужэҥер, Параньга, Марий Турек районласе латкок школ гыч команде-влак толыныт. Ӱярня мелна дене кылдалтше конкурслан кажныже мелнам кышыл дене конден манашат лиеш. Презентацийым чылан ончылно эртареныт. Иктышт мелна руашым ямдылымышт, тудым кӱэшт лукмышт нерген видеомат ямдыленыт. Жюри, мелнан тамжым аклышыла, кочкынат ноен, очыни. Пайрем чес дене палдарыше ончер конкурс деч ончыч фойеште пашам ыштен.
Ӱярня пайрем дене кылдалтше мурым шоныма гоч икшыве-влакын усталык шӱлышышышт тергалтын. Команде-влак вара мурыжым сценыште йоҥгалтареныт.
Моткоч куанле ыле тунемше-влак коклаште гармоньым, моло семӱзгарым шоктышо рвезе-влакым ужаш. Мутлан, Кукнур школ гыч Кирилл Новоселовым налаш. Шке гыч гармоньым шокташ тунемын. Кызыт тӱрлӧ мероприятийыште тудын мастарлыкыштлан эҥертат. А семӱзгар почеш йоҥгалтарыме кажне мурыжат вес сыным налеш, кушташат куштылгырак.
Кечывал деч вара чыланат Йӱштӧ Кугызан илемышкыже кусненыт. Тыгай келшымаш мероприятийлан, самырык-влаклан юарлаш вер тыште пеш келшен толшо: яндар юж, лӱҥгалтыш, курык… Йӱштӧ Кугыза ден Лумӱдыр, Ӱярня ӱдыр нуным вашлийын саламленыт. Организатор-влак тӱрлӧ семын модыктеныт: йоча-шамыч, ӱчашен, шӱшканъече, маскайол дене куржталыныт, вӱдвара дене вӱдым нумалыныт. Кажне команде ыштен кондымо Ӱярня кува дене палдарен.
Мелна дене шокшо чайым подылмеке, чылан пырля курыкыш мунчалташ каеныт. А курыкшо тыште нимучашдыме гай чучеш, «Ӱярня йор-йор» манын шер теммешкак кычкырлышт
Пайрем иктешлыме годым жюри, кум конкурсымат аклен, ойыртемалтше-влакым палемден. Кумшо верыш У Торъял кыдалаш школын «Ӱярня тукым пашма», кокымшыш Шернур районысо Марисола школын «Шож мелна» командыже-влак лектыныт. Икымше Параньга районысо Матародо кыдалаш школын «Кечыйол» командыже лийын. Мутат уке, кажныже мо дене гынат ойыртемалтын. Но мыланем поснак У Торъял командын темлыме шомак гыч шонымо Ӱярнялан пӧлеклалтше почеламутшо келшыш. Тудо «Тыныслык мелна» маналтын. Пытартыш корнылажым ушештарен кодынем: «Тек мелна дене пырля ешыш улылык пура. Шучко сар вашке пыта, тынысым мелна конда».
Светлана Носован фотожо
Снимкыште: ойрытемалтше-влак
Авторын фотожо
