Тыгыде Морко ялыште Семык марий кечышот йӱла пайремым эртареныт.
Семык тыгак тоштыеҥым уштымо йӱла ден кылдалтше пайремлан шотлалтеш, сандене тудым эртарыме радамым шот дене шуктыман. Кумшо гана эртаралтше пайремыш толшо-влакым Морко муниципал район вуйлатыше Гарифий Хуснутдинов, Марий Эл Кугыжаныш Погынын депутатше-влак Наталья Пушкина ден Юрий Игнатьев да молат саламленыт. А 16 усталык коллективын йӱлам шуктымо радамыштлан акым Марий Элысе наукын сулло пашаеҥже Тамара Молотова ден МарНИИЯЛИ-н кугурак шанчыеҥже Владимир Токпулатов пуэныт.
Уна-влак Параньга, У Торъял, Кужэҥер, Советский, Волжский, Морко районла гыч лийыныт. Кажныже шке программыштыже калык йӱлам шуктымым, мурен куштымашым ончыктен, пырля кондымо чес дене сийлен.
Пайрем ӱстел чес ончылно Морко районын тӱҥ картше Анатолий Яковлев сугыньлымо шомакым ойлен. Участник-влак тыгак калык модышым, тӱрлӧ кидпаша шотышто мастер-классым, ончерым эртареныт. Марий семӱзгар денат шокташ туныктышо-влак лийыныт. Верысе книгагудо Семык дене кылдалтше поян материалым ямдылен. Верысе «Шӱмсем аршаш» ансамбль пайрем кумылым нӧлташ полшен. Иктешлымаш годым участник-влаклан диплом да шарнымашан пӧлекым кучыктеныт.
Снимкыште: Семык чес.
Фотом Морко районысо клуб системын воткыл лаштыкше гыч налме.
