Выпускник-влак шинчымашым тергат гын, моло класслаште тунемше-влакын ончылнышт – кеҥеж каныш.
Россий Просвещений министерстве 2025 ийым образований системыште Йоча каныш идалык семын увертарен.
Ты шотышто Образований да науко министерстве «Кеҥеж» ресурс рӱдер дене пырля семинарым эртарен. Тушто 2025 ийысе кеҥеж кампаний дене кылдалтше ик эн кӱлешан йодышлам каҥашеныт.
Лишыл кечылаште республикыштына йоча-влаклан каныме да тазалыкым пеҥгыдемдыме 200 утла организаций (тышеч школ пеленысе 180 лагерь, ола деч ӧрдыжсӧ – 20, палаткан – 6) омсажым почеш, тушто чумыр налмаште 300 вожатый пашам ышташ тӱҥалеш. Чылаже тений 7-18 ияш 25 тӱжем наре тунемшылан канаш йӧн ышталтын.
Лагерьлаште смене-влакым эртараш социальный партнёр-шамычым ушымо, нунын коклаште – «Знание» Россий обществе, Марий Элыште Икымше-влакын толкынышт, «Защитники Отечества» фонд.
Йоча каныш шотышто йодышым федеральный «шокшо» линий дене – 8 (800)250-28-90 рашемдаш лиеш
Г.Кожевникова
Михаил Скобелвын фотожо
