Тӱвыра да искусство дене кылдалтше тунемме организацийлаште тыршыше-влакын йӱлаш пурышо республик кӱкшытан Августысо конференцийышт Я.Эшпай лӱмеш Марий кугыжаныш филармонийыште эртен.
Погынышо-влаклан Марий Эл тӱвыра, савыктыш да калык-влак паша шотышто министр Константин Иванов республикыштына «Тӱвыра» ден «Российыште шонен лукмо» федеральный проект-влак почеш ышталтше паша дене палдарен. Тудын палемдымыж почеш, нунылан кӧра тунемме верлаште материально-технический базым пеҥгыдемдаш, ончыкылык специалист-влаклан ешартыш шинчымашым налаш у оборудованийым налаш йӧн лийын.
«Педагогын да наставникын идалыкыштышт уло педапгогический сообществылан тауштымо шуэш. Чылаланат пеҥгыде тазалыкым, тынысым, мучашдыме вий-куатым, усталык шӱлышым да талантан, тауштен моштышо тунемше-шамычым тыланем. Тӱвыра сферысе профессионал образованийын выпускникше-влак шинчымашыштым да наставникыштын опытыштым калык йӱлам арален кодымаште моштен кучылтыт. Тыгодымак нуно кундемыштына илыше-влакым классический тӱвыра поянлык да кызытсе искусство дене палдарат», – палемден министр.
Ончычсо ийласе семынак конференцийыште «Идалыкын преподавательже-2023» республик кӱкшытан конкурсышто сеҥыше-влакым да «Российын самырык талантше-влак» конкурсын лауреатше-шамычым саламленыт.
Г.Кожевникова
Фотом Марий Эл Тӱвыра, савыктыш да калык паша шотышто министерствын сайтше гыч налме
