Марий Элым вуйлатышын пашажым жаплан шуктышо Юрий Зайцев Фестивальный микрорайонышто социальный тӧнеж-влакым чоҥымо йодышым контрольыш налын.
Тудыжо эн ончычак палемдыме кундемыште йочасадым чоҥымо дене кылдалтын.
Регионын чоҥымо паша, архитектур да ЖКХ министрже Михаил Степановын каласкалымыж почеш, кумдыкым комплексно вияҥдыме ойпидышым 10 ий ончыч ыштыме. Тудын дене келшышын, застройщик илыме пӧрт-влакым нӧлтымо деч посна эше школ деч ончычсо кок тӧнежым чоҥышаш улмаш. Но документын срокшо эртен, а социальный объект-влак тугак уке улыт.
Кызытсе жаплан Фестивальный микрорайонышто илыме верым 65 процентлан чоҥымо, шуко пачеран 22 пӧртым нӧлтымӧ, да чоҥымо паша тачат чолган шукталтеш.
Калыкым кӱкшӧ пӧртлашке илаш пуртымо деч посна социальный инфраструктурын объектше-влакат чоҥалтшаш улыт, кумдык комплексно вияҥшаш. Сандене олан администрацийже ден инвестор-влак коклаште лекше ӱчашымашым граждан-шамычын интересыштым шотыш налын решатлаш кӱлеш, палемден Ю.Зайцев.
Марий Эл Республикым вуйлатышын организаций да аналитике виктемжын уверже негызеш М.ИВАНОВА ямдылен
