Икымше 5 еш Марий Эл Республик вуйлатышын «Йочам сайын ончен куштымылан» Почетан знак дене палемдалтын.
Тиде знакым Юрий Зайцев тений ноябрьыште учредитлен. А 28 ноябрьыште правительстве пӧртыштӧ Аван кечыже пайрем лӱмеш ты знакым кучыктымо икымше церемоний эртен.
Регион вуйлатыше Юрий Зайцев палемден: наградым сулышо кажне еш тунеммаште, пашаште, спортышто, творчествыште, наукышто але искусствышто кӱкшытыш шушо икшыве-влакым ончен куштен да кушта.
– Йочада-влак кокла гыч кажныже ала-мо шотышто талантан: ала-кудыжо мура, ала-кудыжо кушта, да шканже веле огыл, а тидым профессионал кӱкшытыштӧ ышта. Шочшыда-влакым те спортлан, искусствылан кумылаҥден, тушко виктарен кертында. Ме чыланат ача-ава улына, да икшыве шотан айдеме семын чын корно дене ошкылжо манын, тудым жапыштыже виктарен колтымын кӱлешлыкшым сайын умылена, – каласен тудо.
Награде дене палемдыме-влак кокла гыч иктыже – художественный гимнастике дене Российын спорт мастерже Юлия Козлован ешыже. Тудо кум кӱшыл образованийым налын, экономике науко кандидат, всероссийский таҥасымашлаште ик гана веле огыл сеҥышыш лектын. Кум шочшыжымат: ик ӱдырым да кок эргым – тыгаяк чолгам да спортлан шӱманым ончен кушта.
Елена ден Эдуард Батаевмытын вич шочшышт да ашнаш налме тынарак икшывышт уло. Тыгодым ача-ава нуным «шкеныштынлан» да «йотлан» йӧршынат огыт ойыркале. Чылаштымат йӧратен да пагален, пашалан, спортлан, сем тӱнялан шӱмаҥден куштат.
Татьяна Шабдарован ешыж дене Марий Эл вуйлатыше палыме: кеҥежым тудо нунын деке унала миен. Шабдаровмыт Шернур районысо Купсола ялыште илат да шым шочшым: ныл ӱдырым да кум йыгыр эргым – ончен куштат. Вате-марийын кызыт уныкаштат улыт.
Тиде еш мӱкшым ашна. Паша шуко гынат, Татьяна чыла шотыштат пелашыжлан полша, тыгодым икшыве-шамычланат жапым ситышын ойыраш йӧным муэш. Нуно чылажымат пырля ышташ тунемыныт: пашамат, усталык корнымат пырля виктарат.
Волжский район гыч Тамара Яранцева кызыт ашнаш налме вич шочшым кушта. Шкенжын кок йочаж ден тымарте ешыш налме ныл икшывыже ынде кугу улыт. Аван ойлымыж почеш, йоча-влак тыршен тунемыт, спорт да усталык шотышто школын да районын илышышкышт чолган ушнат. Адакшым нуно 12 еҥан еш семӱзгар ансамбльым чумыреныт.
Юрино район гыч Лидия ден Евгений Овсянниковмытын шочшышт кугу улыт. Кок эргыштат военныйын пашажым ойырен налыныт. Ача-авашт нунын дене чот кугешнат. Кугурак Юрий эргышт кугыжаныш награде-влак дене палемдалтын. Нунын коклаште – кок Мужество орден, «За отвагу» медаль да моло. Кызыт тудо Украиныште, специальный военный операцийыште. Александр РФ-н военно-космический вий структурышто службым эрта. Москваште Йошкар площадьыште лийше кок парадын участникше.
– Фронт гыч эргым вучаш – моткоч неле. Тиде, очыни, эн чот чыташ лийдыме. Тыланда вуйнам савена. Мый ӱшанем: эргыда герой семын пӧртылеш. Чылаландат пиалым да тазалыкым тыланем. Тек ешыштыда йӧратымаш озалана да йочан воштылмо йӱкшӧ шокта, – каласен Юрий Зайцев.
Евгений Овсянников республик вуйлатышылан тауштен, тыге каласен:
– Тыланда Марий Эл вуйлатыше куштылго огыл пашаштыда кугу кӱкшытым, сеҥымашым да тазалыкым тыланем. А чыла ава-влакым пайремышт дене саламлем. Кугу тау тыланда.
Марий Эл вуйлатыше кажне еш дене мутланен да йӧршешат куштылго огыл, но моткочак кӱлешан – йочам ончен куштымо – пашам шуктымылан тауштен.
Марий Эл Республикым вуйлатышын организаций да аналитике виктемжын уверже негызеш Л.Камалетдинова ямдылен
