Марий Элын Калык илышым саемдыме шотышто министерствыже «Няня» ешартыш услугым пуртен.
Министерстве мобилизоватлыме граждан-влакын ешышт дене умбакыже пашам ышта. Кызыт адресный полышын кугытшым рашемда. Мобилизоватлыме еҥын кӧжӧ (пелашыже, йочаже, ача-аваже) кодмым, нунын могай пашам ыштымыштым, могай доходым налмыштым, могай проблемышт улмым умылаш манын, социальный паспортым ямдыла. Калыкым социально обслуживатлыме комплексный рӱдерлан специалистше-шамыч палемдыме ешлаште вашлиялтше эн неле йодыш-влакым рашемденыт. Тидымак шотыш налын, Калык илышым саемдыме шотышто министерстве мобилизоватлыме граждан-шамычын ешыштлан «Няня» лӱман эше ик ешартыш услугым пуртен. Ынде, мутлан, йочам школ гыч вашлияш, кружокыш ужаташ, эсогыл икмыняр жап ончаш кӱлеш гын, ава-влак олаласе да районласе калыкым социально обслуживатлыме комплексный рӱдерлашке полышым йодын миен кертыт. Туштыжо нунылан социальный пашаеҥым палемдат да нянян услугыжым чылт яра ыштат.
Таче кечылан 97 специалист республикнан чыла олаштыже да районыштыжо полышым пуаш ямде. Нунын кокла гыч шукышт тиде направлений дене ӱмаште лӱмынак тунемыныт. Социальный пашаеҥ авалан кечыште ныл шагат марте полшен кертеш.
М.ИВАНОВА
