21 февраль — Шочмо йылмын кечыже. Ты кечын шукын йылмым аралыме нерген мутым луктыт.
Тачысе саманыште самырык-влак шочмо йылмышт дене шагалрак да шагалрак мутланат. Нуным кумылаҥдаш у технологий сайын полша. Марий йылмымат Интернет полшымо дене тунемаш лиеш. Мутлан, «Вконтакте» соцсетьыште «Марийский язык с Натальей Вениной» группо уло. Тушто кажне кумылан марий шомак, йомак, муро дене палыме лийын кертеш. Эсогыл «Чоныштем илет» сериалымат ончаш йӧн уло.Тудо ты лаштыкыште видеурокымат темла.
Наталья Марий кугыжаныш университетым тунем пытарен. Ты группым «Марий йылме, пелед» проект кышкарыште ыштыме.
Тыгак ты соцсетьыштак «Марий йоча» группо «шочын». Тудо шукерте огыл почылтын, туге гынат тыгай кӱчык жапыште тушко 100 утла еҥ ушнен. Туштат марий йылмым тунемаш йӧн уло. Группышко ятыр марий мутым, почеламутым, шулдыран ой-влакым чумырымо.
Л.ШАБДАРОВА
