Йошкар-Оласе общеобразовательный организаций-влакын кочмыверысе менюш шыл дене тар шӱрашан пучымыш пурталтеш. 29 сентябрьыште тудын презентацийже рӱдоласе 28-ше №-ан лицейыште лийын. Ты кечын меат тушко мийышна да пучымышым тамлен ончышна.
Но тидын деч ончыч мемнам школ пеленак верланыше Таза йоча кочкыш рӱдерын пашаеҥже-влак вашлийыч. Нунын мутышт почеш, ты лицейын менюшкыжо идалык наре ончыч подкогыльым пуртымо.
– Тудым йоча-влак йӧратен кочкыт. А пучымыш шотышто ойлаш гын, айдемын организмжылан пайдале ты кочкыш марий калыкын веле огыл, рушынат да молынат эре лийын да кызытат уло. Ты гана ме школысо кочмыверын менюшкыжо шыл дене тар шӱрашан пучымышым да турнявӧчыж ден олман йӱышым пуртенна. Марий калыкын рецептше почеш пучымышым ямдылыме годым шкенан республикысе производитель-влакын сатуштым кучылтынна, олма ден турнявӧчыжымат мемнан кундемыштак погымо, – каласышт нуно.
Кочмыверыш пурымына татыште повар-влакын кочкышышт ямде лийын да нуно «раздаче» манмыштет тыршеныт. Дежурный тунемше-шамыч икшырымын гына пучымышым, йӱышым, киндым ӱстел еда вераҥдылыныт. Нуным тӱткын гына Республикын ача-ава контроль мер штабшын вуйлатышыже, рӱдоласе ача-ава-влакын комитетыштын председательже Ольга Чеснокова да Йошкар-Оласе тӱрлӧ школла гыч штабын еҥже-влак Денис Клименчук, Ирина Лобастова да Елена Кузнецова эскереныт: кочкыш йӱштӧ але шокшо, ӱстелыш кунам вераҥдыме да тулеч молымат.
Индеш шагатат нылле вич минутлан кочмыверыш тӱҥалтыш школышто тунемше-влак ик класс почеш весе почела-почела вераҥыч.
Презентацийыште Марий Эл образований да науко министр Лариса Ревуцкая, Йошкар-Оласе образований виктемым вуйлатыше Елена Филиппова лийыныт.
– Кок ий почела школ менюш марий калыкын кочкышыжым пурташ тыршена. Тӱҥалынна ик эн проста гыч, тиде – кундемыштына шочын-кушшо емыжсаска гыч морс, компот. Ӱмаште Таза йоча кочкыш рӱдер рационыш подкогыльым пуртен. Йоча-влак деч «Могай кочкыш тыланда эн чот келша?» йодмылан шукынжо лач тудым палемденыт. Таче ынде эше ик ошкылым ыштена», – каласыш Лариса Ревуцкая.
Тиде жапыште йоча-влак пучымышым тамлен онченыт: иктылан келшен да тудо уло кумылын кочкын, весе – эркынрак, а кумшо шӱкалын… Туге тудо, айдеме кеч изи, кеч кугу ийготан лийже, кажныжын – шке умшатамже. Нунын кочмыштымат ача-ава контрольын еҥже-шамыч эскереныт, мучаш марте лийыныт. Нунын иктешлымашышт почеш, чыла тунемше гыч 40 процентше пучымышым йӧршынат кочкын огыл. Ончыкыжым кузе лиеш – жап ончыкта. Но, чыным ойлаш гын, йоча-влак тар пучымышым мӧҥгыштат пешыжак огыт коч. Молан? Тидым, очыни, нуно гына каласен кертыт.
Г.Кожевникова
М.Скобелевын фотожо
