Республикнан рӱдолаштыже икымше гана поро кумылым ончыктымо «Йоча КиноМай» кинофорум эртен.
Тудо Республикысе курчак театрыште пайремлын почылтын.
Кино искусствым йӧратыше-влаклан 23-27 октябрьыште шым площадкыште 16 фильмым («Честное пионерское», «Суворовец 44», «Крошка», «Сестрёнка», «Африка» да молат) оксам тӱлыде ончаш йӧн лийын.
– Йошкар-Олаш шукертак толаш шоненна ыле. Ты гана шонымашна шукталте. Йошкар-Ола – пеш мотор ола. Мемнан фондна 15 ий утла пашам ышта. Тиде жапыште Российын тӱрлӧ олаштыже лийынна, йот эллашкат икмыняр гана миен коштынна, – палемден «Йоча КиноМай» фондын президентше Лидия Евтушенкова. – Фонд йоча социальный учреждений-влаклан шийвундо дене полша. Тидыжак мемнан ик эн тӱҥ пашаланна шотлалтеш. Марий Элыште ныл тыгай учрежденийлан чылаже 850 тӱжем теҥгем ойыренна.
Полышым налше ик тыгай учрежденийлан И.С.Палантай лӱмеш тӱвыра да сымыктыш колледжын Национальный сымыктыш гимназийже шотлалтеш. Ты тунемме тӧнежым вуйлатыше Алексей Паскичевлан семӱзгарым налаш сертификатым кучыктеныт.
Кинофорум жапыште «Мыйын еш историй» конкурсышто сеҥыше-влакымат палемденыт. Организатор-влакын мутышт почеш, 11-15 ияш йоча-влак чоным тарватыше, шонаш таратыше пашашт дене моткоч куандареныт да молан гынат нунымат туныктеныт.
Нине кечылаште тӱрлӧ мастер-класс ден усталык вашлиймаш-влакат оҥайын эртеныт. Йошкар-Оласе 7-ше №-ан кыдалаш школышто «Варяг» марий кадет рӱдерын воспитанникше-влаклан Россий киноартист Валерий Иваков ден Максим Кулямин дене мутланымаш шочмо элым эшеат йӧраташ да тудын дене кугешнаш таратен.
Тулык, ача-авадыме да эмганен вияҥше икшыве-влаклан лӱмын келыштарыме Лӱльпанысе рӱдерын воспитанникше-влак Российысе киноартист-влак дене вашлийын мутланен да нунын деч тӱрлӧ йодышыштлан вашмутым налын кертмыштлан моткоч йывыртеныт.
Сылнымутым йӧратыше-влаклан В.Х.Колумб лӱмеш йоча да самырык-влаклан книгагудышто киновед да сценарист Анна Пендракова дене пырля йомакым возаш келшен.
Тыгай вашлиймаш кушкын толшо тукымлан пеш пайдале. Тудо Россий артист, сценарист-влакын ямдылыме фильмыштым ончаш, шкешт дене палыме лияш да илышым вес шӧрын дене ончалаш полша.
Алевтина БАЙКОВА
Авторын фотожо.
