Геннадий Сабанцев
Чынак, кодшо шуматкечын, 14 ноябрьыште, кечыгут йӱр чарныде йӱрӧ. А игечыште кеч-могай вашталтыш айдеме чоныш у шижмашым пурта, тудым весе денат палдарыме шуэш.
Тидланже ты кастене Йошкар-Оласе «Онар» сийгудын «Фото-кофейня» манмаштыже сай йӧн ыле – марий сылнымутлан шӱман-влакын «Чонволгалтыш» семинар-лабораторийышкыже коштшо-влак черетан вашлиймашкыштпогыненыт. Тыгай вашлиймашым нуно йӱлаш пурышо «квартирник» мут дене лӱмдат. Марлаже «шинчаш погынымаш» манашат келшен толеш дыр. Вет ожно марий суртышко кастене лач тыге шинчаш погыненыт, тӱрлым мутланеныт, тӱрлӧ модыш дене модыныт.
«Чонволгалтышыштат» чон почын мутланымаш шочеш. Но – поэзий шомак гоч. Семинар-лабораторийыш коштшо-влак ынде вич ий почела тыгай касым эртарат. Изирак лӱмгечыштлан уна-влакым икымше гана моткоч поро, чоным ныжылтарыше «Фото-кофейньыш» ӱжыныт.
Да нуно шагалын огыл толыныт. Икмыняр еш изи йочаштымат пырля конден. Поэт-влак, тамле кофем подыл шинчыме лугыч, микрофон дек лектын, почеламутыштым лудыныт. Вӱдышӧ Альбертина Иванова икте почеш весылан: Геннадий Оярлан, Герман Пироговлан, Алёна Яковлевалан, Игорь Поповлан, Надежда Моисеевалан, Екатерина Тетериналан, Алёна Антонова-Яковлевалан, Людмила Семёновалан да молыланат – мутым пуэн. Геннадий Григорьев гитар почеш муралтен, тыгак Алёна Яковлева мурыж-влак дене палдарен.
Касыш толшо пагалыме ветеран-влак: Римма Катаева ден Людмила Кошкина – тыгай касын пеш пайдале улмыж нерген шӱм вошт ойленыт, йӧратыме почеламутыштым лудын пуэныт.
«Чонволгалтыш» семинар-лабораторий, чынак, путырак кӱлешан сомылым шукта – марий сылнымутым калыкыште шара. Тидлан ончыкылык пашаштышт, утларак кугу залыш колыштшо-влакым чумырен, тыгай вашлиймашым кумдан эртараш шонымаш уло.
Республикысе уверлаште ме шуэн огыл рушла возышо йолташна-влакын, «Пегас» клубын уста еҥже-влакын, тӱрлӧ вере сылнымут вашлиймашым эртарымышт нерген пален налына. Нуно эсогыл вес олалашкат лектеден коштыт. Марла сылнымут кас-влакым утларак кумдан эртарыме йӱлам мыланнат уэш илышыш шыҥдараш кӱлешак.
Снимкылаште:Поэзий шомак чоным кандара.
📸Фотом «Унагудо» ушемын воткыл лаштыкше гыч налме.




