С.Г.Чавайн лӱмеш национальный книгагудышто «Марий Эл Републикын Книга палатыжлан – 65 ий» йыргешке ӱстел эртен.
Тушто книгагудылаште, савыктыше организацийлаште ыштыше, тыгак автор-влакын Марий Эл Республикысе печатьын архивше дене палдареныт. Тудо республикысе калыкнан тӱвыра да историй поянлыкшын ик эн кӱлешан ужашыжлан шотлалтеш. Республикысе тӱҥ книгагудын Книга палатыжым вуйлатышын пашажым жплан шуктышо Аида Пчелкина выступатлен. Юриспруденций, надзор паша, кугыжаныш библиографий учёт дене кылдалтше савыктыш-влакын экземплярышт книгагудышто лийшаш улмо, Печатьын летописьшым шуэн толаш кӱлмӧ нергенат мутланымаш каен. Марий Элын Тӱвыра, савыктыш да калык-влакын пашашт шотышто министерствыжын печать пашалан вуйын шогышо пӧлка вуйлатыше Аида Макова республикыштына книгам савыктыме дене кылдалтше йодышым волгалтарен. Сай ошкыл семын книгагудо пелен национальный электрон книгагудын лектышыжым палемдыме.
Вара Книга палате дене сай кылым кучышо-влакым палемденыт. «Марий Эл» газет редакцийын тӱҥ редакторжо Светлана Пехметовалан тауштымашым кучыктеныт. Каласен кодыман: «Марий Эл» ден «Сурт-Пече» газетна-влакын печатлыме да электрон версийышт (чылажак огыл) книгагудын фондыштыжо аралалтыт.
С.Носова
Снимкыште: газетна книгагудыш толшо кажне еҥ шергал кертеш.
С.Пехметован фотожо.
