Марий тӱвыра рӱдер Марий Элын Тӱвыра, савыктыш да калык-влакын пашашт шотышто министерствыжын полшымыж дене эртарыме «Мунло» интеллектуал марафон поро йӱлаш савырнен шуын.
Эн ончыч кажне ийын тушко утларак да утларак команде-влакын ушнымыштым ончыктыман. Тений эсогыл кумыланже 20 утла лийын. Но нунын кокла гыч 12 гына ойырен налыныт. Але марте утларакшым Йошкар-Ола гыч команде-влак ушненыт гын, тений – районла гыч.
Йошкар-Ола гыч «Саскавий» ӱдырамаш да Марий писатель ушем-влакын, тыгак «Югорно» да «Ленин проспект» команде-шамыч лийыныт, молышт районла гыч чолган ушненыт: Юлсер, Звенигово, Медведево, Морко, Советский, Кужэҥер, Параньга, У Торъял кундем гыч толыныт. Ты гана кум турышто 10 йодыш гыч вашешташ логалын: лӱмлӧ еҥ, марий йылме да сылнымут, калык йӱла дене кылдалтше лийыныт.
Икымше верыш Советский районысо «Кундыштӱр» команде лектын. Тудо 118 баллым поген. Кокымшо Параньга район Матародо школын да кумшо Кужэҥер районысо «Чумбылат» командышт лийыныт.
Снимкыште: икымше верыш лекше команде.
Р.Николаеван фотожо
Светлана Носова
