Тачысе унана – Кужэҥер район Йӱледӱр ялыште илыше кидмастар Александр Якимов.
– Мый Кугу Лаждӱр ялыште шочынам. Ондакше туштак иленам, вара тышке кусненам. Шке жапыштыже Н.Крупская лӱмеш Марий педагогический институтын индустриально-педагогический факультетшым тунем пытаренам. Визымше курсыш тунеммем годым Йӱледӱр школыш толынам ыле, тунмак мылам тыште моткоч келшен, а варажым ты тунемме верыштак «Труд» предметым туныкташ тӱҥалынам. Кызыт 5-7-ше класслаште тунемше-влак дене кидпашам ыштена, а 8-ше классыш коштшо-шамыч дене электротехнике дене теорийым тунемына, 9-ше класс дене профориентаций паша эртаралтеш, – каласыш Александр Николаевич.
– «Машиноведений» предметым тыште чылаже 22 ий туныктенам, 2020 ий марте, – умбакыже ойла туныктышо. – Рвезе-влакым В, С категориян трактористлан туныктенна. Тунам комбайн, гусеницан трактор дене пашам ышташ правам пуэныт, но варажым тиде пытыш, тракторист-машинистлан гына туныктен луктынна. Выпускник-влак верысе «Искра» колхозышто пашам ыштеныт. Кызыт ынде тыгай йӧн уке, вет лицензийлан базе, трактородром да технике кӱлыт. Санденак трактористлан вер вере тунемыт, тӱҥ шотышто – Йошкар-Оласе аграрный колледжыште. Тудым вуйлатыше Геннадий Богданов дене вашкылна пеҥгыде. Тунемше-влак дене пырля колледжын машина-трактор паркыштыже экскурсий дене лийынна. Рвезе-влаклан келшен, ты профессийлан тунемаш кумылышт лектын. Вет тымарте нунын шонымашышт вестӱрло лийын. Трактористын паша лавыран шоненыт. А кызыт илыш вашталтын, техникат уэмын. Кызытсе тракторышто кеҥежым шокшо огыл, вет тушто вентиляций ден кондиционер улыт. Пашадарат сай, ик маркан дене ыштышын – 40 тӱжем теҥге, а вес марке дене ыштышын – вес кугыт.
Йӱледӱр школышто кызыт чылаже 149 йоча тунемеш, 11-ше классыште шымытын улыт. Тунемме верын кок школ автобусшо уло. Александр Николаевич эше диспетчер-контролёрлан пашам ышта, автобусым виктараш рейс деч ончыч осмотрым эртара. Тыгак тудо тунемме верын книгагудыштыжо тырша.
Мутланыме годым пӧръеҥ 1998 ийым шарналтыш. Тунам, пашаш толмеке, тыште плотник ӱзгаржат уке ыле, тоштемше пужар-шамыч да полуфуганок гына лийыныт. Петырыме Лаждӱр школ гыч гына кондымо. Александр Николаевичын мушо почеш, рвезе-влак дене пырля тошто кровать гыч октябрь гыч май марте пужарым погеныт…
Мый шырчыкомарта-шамыч шотыштат йодышым пуыде шым керт вет нуныжо тыште – йырым-йыр кечат
– Школыштына «Кайыклан пӧрт» конкурсым увертаренна ыле. Тудын почеш кажне класс шырчыкомартам ямдылен. Варажым нуным рвезе-влак йырым-йырым пушеҥгылаш сакаленыт, – вашештышт туныктышо.
Каласыман, Александр Николаевич вӱдуа дене пидше мастар семын палыме. Шке жапыштыже йоча-влаклан кружокымат эртарен.
Туныктышо дене ме мастерскойым, школ кудывечым, шырчыкомарта-шамычым, школын тошто оралтыжым, тракторжым ончен лекна. Тракторжым ужмеке, мый шоналтышым: содыки жал ялысе рвезе-влаклан тыштак трактористлан тунемаш йӧн уке…
М.СКОБЕЛЕВ
Авторын фотожо
