«Шинча ончылно кучаш тыршена», –
манеш Кужэҥер район, Йӱледӱр ял илем администрацийым вуйлатыше Т.Чиркова.
Татьяна Николаевнан мутшо почеш, тиде ял шотан илем кумдык шот дене районышто эн кугу да специальный военный операцийыште участвоватлышат шукынрак. Мобилизоватлыме, тыгак шке кумылын элым аралаш кайыше-влакын шукыштын ешышт, йочашт улыт. Икмынярыштын йочашт олаште илат, тыште кодшыжо-шамычат улыт. Нунын нергенат огыт мондо. Мутлан, район администраций вуйлатыше С.Михеевын тӱҥалтышыж почеш, военный операцийын участникше-влакын ешыштлан пум яра конден пуат. Тидлан верысе кучемат, тыгак район администраций вуйлатышат кугу тӱткышым ойырат, терген шогат. Южыжо пӧртым ырыкташ веле огыл, мончашке олташат полыш пуым налын. Юридический, психологический полыш нергенат огыт мондо.
– Боевой операцийыште лийше-влак отпускыш толыт але сусырген пӧртылыт гын, тыгай-влак дене ме тыште пеҥгыде кылым ыштена. Южыжо шкештак администрацийыш толыт, поро мутым ойлат, Украин мландыште лиймышт нерген каласкалат. Чон почын мутланымыжак мом шога! Южыж дене военный частьыште улмышт годым видеокыл гоч мутланена, ешыжлан, йочажлан могай полыш кӱлмӧ нерген мутым луктына.
Элнам аралыше-влак таза пӧртылышт манын, эреак Юмылан пелештена, кумалына. Теве армийыш кайыше але мобилизаций йӧн дене порысыштым шуктышаш-влакым ужатыме годым Йӱледӱр черкын бачышкажым ӱжыктена, тудо кажныжым благословитлен ужата, таза пӧртылаш тылана.
Чаманен каласаш перна, мемнан кундемеш шочын-кушшо, Йӱледӱр школышто тунемше, вара офицер лийше-влак Валерий Малинин ден Станислав Казанцевын ӱмырышт сӧй пасуэш кӱрылтын. Нунын лӱмеш школ пырдыжеш шарнымаш оҥам сакышна, – ойла Татьяна Николаевна. – Шучко тушманым сеҥышаш, элнан ласка да сай ончыкылыкшо верч илышыштым пуышо землякна-влакын лӱмышт курым-курымеш ок мондалт.
В.Смоленцев
Авторын фотожо
