Кужэҥер район Старсела тӱвыра пӧртыштӧ клуб пашаеҥ-влаклан полшымо шот дене усталык лабораторий эртен.
Верысе клубын пашаеҥже ден усталык коллектившын участникше-влак «Коҥга пазар» пайрем дене кылдалтше йӱла-шамыч дене палдареныт да ончыктеныт. Лабораторийыш фольклор коллектив-влакын вуйлатышышт, тӱвыра аланыште ыштыше специалист, тӱрызӧ, республикысе Марий юмыйӱла ушемын еҥже, Кужэҥер, Марий Турек, Параньга районысо коллектив-влак миеныт.
Мероприятийын программыже поян лийын. Карлыган кундемыште илыше одо-влакын тӱвырашт ден йӱлашт денат палдареныт. Культурологий доктор Галина Шкалина марий калыкын моло йӱла пайремже-влак, республикысе Марий тӱвыра рӱдерын специалистше Людмила Кошкина нунын кӱлешлыкше нерген каласкаленыт. Тыгак тений февральыште районышто онлайн йӧн дене эртаралтше «Коҥга пазар пайрем» фестивальымат иктешленыт.
Лабораторий марий калык кочкышым тамлен ончымо да толшо коллектив-влакын выступленийышт дене мучашлалтын.
С.Носова
Снимкыште: сценыште – Старсела тӱвыра пӧртын коллективше.
