Тыге маналташ тӱҥалеш изи чотан финн-угор да самодий калык-влаклан эртаралтше сымыктыш фестиваль.
Ты мероприятийлан лӱмым кычалме конкурс эртыме нерген газетна гоч шукерте огыл палдаренна ыле. Конкурсыш элнан индеш регионжо: Ленинград, Мурманск, Рязань, Нижний Новгород, Ярослав областьла, Марий Эл, Коми, Удмуртий да Мордовий Республикла гыч шӱдӧ наре йодмаш пурен.
Жюрилан Коми Республик гыч Александр Галуцкийын серышыже келшен. Тудо фестивальым «Йӱдвел мардежын семже» («Напевы северного ветра») манаш темлен. Сеҥышылан 2022 ийыште Санкт-Петербург олаште эртыше ты мероприятийыш ӱжмашым кучыктеныт.
Тыгак эше кок еҥ лӱмын ямдылыме призым налын. Кокымшо верым Ленинградский область гыч пурышо «Йӱла памаш» («Источник традиции»), кумшым – Нижегородский область гыч «Ик мланде – ик чон» («Одна земля – одна душа») лӱм-влаклан пуэныт.
О.МОШКИНА
