«Оласе среда да илыме вер» нацпроектын «Оласе йырвелым йӧнаным ыштымаш» федеральный проектыш Йошкар-Ола кудымшо ий почела ушнаш ямдылалтеш. 2017 ий гыч годсек калык тӱшкан коштмо 29 кумдыкым тӱзатыме. Йӱклымаш 15 апрельыште тӱҥалеш.
Но тылеч ончыч шкендан темлымашдам оласе администрацийыш (Ленин проспект, д. 27-ше пӧрт, 216-шо кабинет) пуышаш але blagoustr_gorod@i-ola.ru электрон почтыш колтышаш улыда. Жап шуко кодын огыл, йодмаш-влак 17 март марте налалтыт, вара общественный каҥашымаш лиеш.
«Оласе йырвелым йӧнаным ыштымаш» федеральный проект – калык тӱшкан коштмо кумдыкым тӱзатымаште пеш сай йӧн. Мутлан, Семеновко селаште илыше-влакын тымарте темлыме кум проектышт калык илышым саемдаш полшен. Теният ушнаш шонен пыштеныт. Верысе активист Евгений Калинкин амбулаторий да изи пазар дек шуйналте Интернатский урем корным (Советский урем деч тӱҥалын, Молодежный уремын 3-шо пӧртшӧ марте) тӧрлаш темлымашым ыштен. Тудын ойжо дене селаште илыше 100 утла еҥ келшен.
Тений йӱклымаш 15 апрель гыч 31 май марте эртаралтеш. Рӱдолаште илыше 14 ияш деч кугурак ийготан-влак, 12.gorodsreda.ru платформыш але «Госуслуги» сайтыш пурен, олаште тӱзатышаш кумдык верч шке йӱкыштым пуэн кертыт. Эн шуко йӱкым погышо проект-влак сеҥышылан шотлалтыт да 2024 ийыште нуным илышыш шыҥдарат.
Л.СЕМЕНОВА
