21 сентябрьыште Марий Элын Финанс министерствыжын конференц-залыштыже Марий Эл вуйлатышын стипендийже ден грантше-влакым налше-шамычым саламленыт. Тений республик вуйлатышын стипендийжым 59 еҥлан кучыктеныт. Нунын коклаште 28 ӱдыр-рвезе ссузлаште, 22 вузлаште тунемыт, 9 – аспирантурышто.
Тыгак паша профессий-влакын «Самырык профессионал-влак» (WorldSkills Russia) Российысе таҥасымашын «Предпринимательстве – юниор-влак» номинацийыштышт кумшо верым налше рвезына-влакым палемденыт. Индустрий ден предпринимательстве колледжын тунемшыже-шамыч Кирилл Бадьин ден Данил Симаковлан, туныктышышт Эльвира Яштыковалан Марий Эл вуйлатышын грантшым пуэныт. Грантын кугытшо – 20 тӱжем теҥге.
Стипендиат лияш тунемме ий мучко чыла отметке кокла гыч «визытаным» витле процент деч шагал огыл налман. Тылеч посна республикысе, российысе, тӱнямбал олимпиадылаште пӱсӧ уш-акылым ончыктыман, призовой верыш лекман. Аспирант-влакын шанче пашаштым акленыт.
Ссузышто да ешартыш шинчымашан образованийым налше тунемше-шамыч кажне тылзын 1600 теҥгем, вузышто тунемше 2400 теҥгем, аспирант 3000 теҥгем налаш тӱҥалыт.
Дипломым Марий Эл Правительстве председательын икымше алмаштышыже М.Васютин ден образований да науко министр Н.Адамова кучыктеныт.
Л.ШАБДАРОВА.
М.Скобелевын фотожо.
