«Комсомольская правда» медиагруппын эртарыме «Маршрут построен» конкурсышкыжо Кужэҥер районысо «Марий Швейцарий» каныме базат ушнен.
Тудым Марий Элын Молодёжный политике, спорт да туризм министерствыже темлен. «Марий Швейцарий» ойыртемалтше лӱман каныме базе Визым ял воктене верланен. Пӱртусыш лектын, мотор олык лапым, чодырам, курыклам ужаш лиеш. Памашшинчалан поян верыште каналташ пӧрт-влак улыт, мончашкат пурен лекташ лиеш. Мушкылташыжат памаш вӱдымак кучылтыт. Туштак марий калык кочкыш дене сийлен колтат.
Республикысе каныме базына сеҥышыш лекше манын шонеда гын, конкурсын сайтышкыже пурен, тудлан шке йӱкдам пуэн кертыда. Онлайн- йӱклымашын иктешлымашыжым апрельыште увертарт.
С.Носова
