Таче тендам Морко район Зеленогорский посёлкышто илыше самодеятельный сӱретче Мухаммед Гайсин дене палдарем. Тудын радынаже-влакым Йошкар-Олаште, Моркышто, Зеленогорский лесничествыште, школлаште да моло вере ужаш лиеш.
– Мый телымат, шошымат, кеҥежымат йӧратем, но эн чапле пагыт – шыже. Тудо чиялан моткочак поян. Йӧратем мый йошкар кече лекмым, – ойла сӱретче.
Пӱртӱслан шӱман айдемын пашаштыже тӱҥ верыште пӱртӱсак манаш гына кодеш. Тудын радынаштыже – ял, Весшӱргӧ чодыра, сонар, имне, янлык-влак молат.
– Мый тӱрлӧ сюжетым сӱретлаш йӧратем, но поснак – пейзажым, – умбакыже палдара тудо. – Шкеже Морко посёлкышто шочынам. Школыш коштмо годсек сӱретлем. Икмыняр жап гыч Зеленогорский посёлкыш илаш кусненна, тысе чодыра комбинатыште художник-оформительлан ятыр ий пашам ыштенам. Тушто стенд ден плакат-влакым ямдыленам. А вара радынам сӱретлаш кумылаҥынам. 2000 ийыште Йошкар-Олаште художник-влакын ушемыштын галерейышкышт (тудыжо Коммунистический уремычсе 44-ше пӧртыштӧ лийын) логалынам. Тушто могай-гына радынам ужын омыл! Измаил Ефимовын, Николай Токтауловын, Евгений Ярановын пашашт пеш келшеныт. Нуным ончен, сӱретлаш эшеат кумылаҥым… Кызыт жапем улмо годым гына сӱретлем, вет тачысе саманыште ик тидын дене гына илен лекташ огеш лий. Ялыште мылам моткоч келша. Изиэм годым олаштат иленам да туштак автомашина йымак логалынам, сандене тудо – мыйынлык огыл. А ялыште сай, тымык. Уремыш лектатат, ласкан шӱлалтет…
Пӧрткӧргыжын ик лукыштыжо – сӱретлаш вер, а вес пӧлемысе креслыште – йошкар грифан электрогитар. Но тиде – йӧршеш вес историй…
М.СКОБЕЛЕВ
Авторын фотожо
