Кем, туфльо, кроссовко, кеде… Ӱдыр, ӱдырамаш-влак иктаж-кушко каяш тарванат гын, йолыш мом чийышашым кужун шонкалат. Иктышт писынрак тошкешташ манын, лапкарак да йӧнанрак йолчиемым чият, весышт – моторын кояш тыршен, кӱкшӱ тагананым.
Йолташ-влак, тыланда могай йолчиемым чияш утларак келша? Ойырен налме годым мом шотыш налыда?
Ксения Григорьева, самырык ава (Звенигово район):
– Кӱкшӱ таганан туфльо пеш келша. Ончыч эре тыгайым налын чием ыле. Ава лиймеке, лапкарак йолчиемыш куснаш логале, вет икшыве-влакын почешышт куржталын шуктыман, южгунам кидышкат налын нумалын кайыман.
Йоча-влакын кушкын шумекышт уэш таганан йолчиемым чияш тӱҥалам, шонем. Тыгайже дене ӱдырамашын ошкылын колтымыжат вестӱрлӧ да моторын коеш.
Адакшым ӱдыр-шамычын чыла тӱрлӧ йолчиемыштат лийшаш.
Софья ОСИПОВА-ШАРАБУЕВА, Озаҥ оласе 3-шо №-ан йоча сымыктыш школын туныктышыжо:
– Йолчием чыла шотыштат шканем келшыше, йӧнан лийшаш. Тыгайже дене йол нойымо огеш шижалт. Пашаште але иктаж мероприятийыш лекме годым мотор туфльым чием, а уремыште кошташ лапкаракым ойырем. Садлан кроссовкат, кедат, туфлят улыт. Чылажымат чияш келша.
Маргарита ТОЙШЕВА, Семёновко амбулаторийын врач-педиатрже:
– Илышыште тӱрлӧ йолчиемым чияш перна: спортлан але тора корныш лекме годым кроссовко эн йӧнан. Иктаж пайремыш але театрыш кайыме годым кӱкшырак таганан туфльо моторын коеш. Паша верыште тыглай кече мучко йол ӱмбалне кошташ изирак таганан (супинатор дене) йолчием лачеш лиеш, тыге йол ок нойо.
Катерина ШАБДАРОВА, самырык мурызо:
– Йолчиемым чийыме годым кумылым шотыш налам. Пытартыш жапыште кеч- можымат мотор вургем дене келыштараш лиеш. Мый йӧнан да тыгодымак мотор йолчиемым йӧратем.
Лариса ПЕТРОВА, Унчо школын туныктышыжо (Морко район):
– Могай йолчиемым чияш? Тиде йодыш кеч-кунамат шукыштым тургыжландара. Тыгодым, мутат уке, кушко да молан кайышашым шотыш налман. Мутлан, кафеш шочмо кечым але сӱаным пайремлаш мотор тувыр дене кӱкшӱ таганан туфльым чияш тыршем. Тыглай кечын – йӧнанрак йолчиемым. Но чылт лапка пундашан йолчиемым ом йӧрате, садлан кроссовкымат изиш платформаным налам.
Евгения КОШКИНА, кидмастар, дизайнер:
– Кӱкшӱрак таганан йолчием келша. Тыгайже ӱдырамаш-влакым эшеат сылнештара да ошкылжым моторым ышта. Кӱкшырак таганан йолчием деч посна шкемым ӱшанлын ом чуч.
Анастасия МУРАВЬЕВА, кугыжаныш пашаеҥ (Йошкар-Ола):
– Йолчиемым игечылан, жаплан, верлан келшышым ойырем. Тӱҥжӧ кошташ, а кӱлеш годым куржашат йӧнан лийже. Паша верлан тувыр але классик костюм дене келшен толшым чием, моло вере – кроссовкым, пӱртӱсыш треккинг йолчием келшен толеш. Йолчием саяк лийшаш, шонем, тугайже кужу жаплан сита. Чын ойырымо йолчием да стельке йол тазалыклан пайдам веле кондат. Ойырымо годым кушеч ыштымым, йолышто кузе шинчымым эскерем.
Алевтина БАЙКОВА ямдылен
Авторын да еш альбом гыч налме фото.
