12 май — Медшӱжар-влакын кечышт. Ош халатым чийыше-влакын чоныштат волгыдо, поро, вет нуно еҥым эмлат, таза капкылан ӱмырым шуяш полшат. Изи годым шукынжо врач лияш кумылаҥыт, но кугурак лиймеке, ала-молан шонымашыштым вашталтат.
Йолташ-влак, иктаж гана медицине пашаеҥ лияш шоненда мо? Могай врач лийын кертыда ыле?
Светлана Гладышева, Марий Элын калык артистше:
– Медпашаеҥ лияш шонен омыл. Артист огыл гын, туныктышо лиям ыле дыр, вет пединститутышкат документ-влакым пуэнам ыле. А такшым педиатр лияш гын, сай докан.
Анатолий Зарецких, Марий Элын сулло артистше:
– Ик жапыште эмлызе лияш шоненам. Авамлан Кугу Отечественный сар жапыште шуко неле пашам ышташ логалын. Телым чодырам руымаште чот кылмен, сандене шуко черан лийын: кид-йолжо корштен, шодо чер витарен. Авамын йӧсӧ улмым шижын, кугу лиймеке, черле-шамычлан полшаш тӱҥалам манын шоненам. Хирург лиймем шуын. Но, кушкын шумеке, усталык паша утларак келшен. Йоча годымак эше муренна, куштенна, концерт-влакым эртаренна да кызытат ты сомыл чонемлан лишыл.
Татьяна Пчёлкина, Марий Эл культурын сулло пашаеҥже, поэтессе:
– 1988 ийыште Йошкар-Оласе медучилищым тунем пытаренам. 14 ий медшӱжарлан пашам ыштенам. 1998 ийыште массажистлан тунемын лектынам да кертме семын калыкым эмлаш полшем. А врач лияш шоненжат омыл, но тунемашак каем гын, невропатолог лиям ыле. Тазалык пеҥгыде лийже манын, нерве системым перегыман.
Елена Мочалова, Марий Элын сулло артистше:
– Йоча годым врачак лиям шоненам. Адакшым ешыштак огыл гынат, тукымышто тиде корным тошкышо-влак лийыныт. Могай врач лийнем ыле – тӱҥ огыл, пашаже – южгунамже ӱшаным йомдарыше айдемылан полшен кертмаште.
Надежда Яндова, Звенигово районысо Какшамарий тӱвыра да каныме рӱдер вуйлатыше:
– Латикымше классым тунем лекмеке, медпашаеҥ лиям манын шоненам, но трукышто шонымашем вашталтын. Очыни, педиатр лиям ыле.
А.БАЙКОВА
Фотом https://yandex.ru/images/search?text=день%20медсестры&stype=image&lr=41&source=serp сайтыште налме
