21 июньышто Ижевск оласе Космонавт-влакын паркыштышт икымше гана Пеледыш пайрем эртен.
Мероприятийым «Ижевск мари» мер организаций шкенжын 35 ияш лӱмгечыжлан пӧлеклен. Тудым «Одо мари ушемын» пашажым виктарыше Николай Ямаков тӱҥалтыш гычак вуйлата. Ты пагытыште кундемысе чолга марий-влак шочмо калыкын тӱвыраж ден йӱлажым вияҥдаш полшышо шуко сай пашам ворандареныт.
Пайремжым эртараш Николай Ямаковак темлен да ямдылалтме пашаш шуко еҥым ушен кертын. Кугу концерт программым Ижевск да республикысе моло олала, районла, тыгак Татарстанысе Агрыз район, Набережные Челны ола, Киров область гыч усталык коллектив-влак сӧрастареныт. Тӱрлӧ мастер-класс, кидпаша ончер-ярмиҥга, калык модыш эртеныт, «кандырам» тӱшкан куштеныт. Пайремыш тӱрлӧ национальностян еҥ-влак ушненыт.
Николай Ямаков Мер Каҥаш деч саламлымашан серышым лудын пуэн. Тыгак «Одо мари ушемын» икмыняр чолга еҥжылан Мер Каҥашын чап таныкшым кучыктеныт.
Николай Ямаковын воткыл лаштыкше гыч налме фото.
