КУЧЕМ УВЕР СЫМЫКТЫШ ТЕАТР УВЕР ЙОГЫН

ИВИ: Марий Элын сеҥымашыже – Российысе эн сай проектыште

1МI медиахолдинг ден «Интернетым вияҥдыме институт» (ИВИ) автономный коммерческий огыл организаций «20 ий жапыште Российысе эн тӱҥ событий» нацпроектым шуктен толмо дене келшышын, Российысе самырык тукымлан элнан кызытсе историйже гыч эн кӱлешан ужашлам шымлат.

Социологический шымлымашке 18-35 ияш-влак ушненыт. Нуно  элыштына эртаралтше кӱлешан 15 событийым да Российын посна субъектшылан келшыше 5 событийым каласышаш улыт.

Мутна – Марий Эл нерген. Республикын эртен толмо корныжо ӧрыктарыше, тӱвыраже поян да ойыртемалтше, калыкшат унам вашлийын моштышо. Пытартыш кок ий жапыште регион шке ойыртемжым арален коден веле огыл, а вияҥмыж дене моткоч кугу кӱкшытыш шуын.

Кок ий жапыште Марий Элыште тӱшкан пайдалыныме 11 кумдыкым тӱзатеныт. Мутлан, тыгай паша Козьмодемьянск оласе Пыринов уремыште шукталтын. Шойбулак селаште Тыныслык уремыште автокорным олмыктеныт, Параньга посёлкышто Сеҥымашлан 40 ий темме лӱмеш скверым ачаленыт. Тидын нерген rostovgaseta.ru сайтыште возат.

Регионышто райрӱдыласе тӱвыра пӧрт-влакымат пужен ыштеныт. Ӱмаште гына «Культур» нацпроект полшымо дене ялласе кум культур пӧртым уэмденыт. А кум ий жапыште тыгай паша лу объектыште шукталтын.

Пытартыш жапыште Марий Элыште ятыр тунемме верым олмыктымо да чоҥымо. Мутлан, Советский районысо Топкайэҥер школын спортзалжым пӱтынек уэмдаш пеҥгыдемдыме. Тиддеч посна у спортзалым Марий Турек районысо Сысоево школыштат ыштеныт.

Волжскышто 2019 ий гыч у йочасад пашам ышташ тӱҥалын, ындыжым тушто чыла икшывыланат вер ситышын. А 2020 ийыште туштак 5-ше №-ан школын у корпусшым почыныт.

Йошкар-Олаштат ятыр вашталтыш лийын: Ю.М.Свирин лӱмеш скверым олмыктеныт, Свердлов уремыште йолешкылан вончымо корным йӧнештареныт.

2014 ий гыч республикын рӱдолажын унаже-влакым Э.Сапаев лӱмеш опер да балет театр посна полатыште вашлиеш. Театрын сценыжым тӱнямбал стандарт дене келшышын ыштыме. Тудын кумдыкшо – 432 квадрат метр, а залыште 644 креслым вераҥдыме.

А.БАЙКОВА ямдылен.    

 

Опубликовать в Одноклассники

Добавить комментарий